સોશિયલ મિડિયા સાથેની દોસ્તી નોકરી માટે ખતરારૂપ

શું સોશિયલ મિડિયાના વપરાશના લીધે નોકરી જઈ શકે? કારકિર્દી જોખમમાં આવી શકે? બિલકુલ. જો તમારો સોશિયલ મિડિયા પ્રોફાઈલ, તમારી પોસ્ટ તમને બેજવાબદાર રજૂ કરે તો નોકરી જઈ શકે, નવી નોકરી મળી પણ ન શકે.

- કેતન મિસ્ત્રી (મુંબઈ)

પાંચેક મહિના પહેલાંની વાત. બિહારનું ગયાસ્થિત મહાબોધિ ટેમ્પલ કૉમ્પ્લેક્સ. બૌદ્ધધર્મીઓ માટેની યુનેસ્કોએ જાહેર કરેલી આ વર્લ્ડ હેરિટેજ સાઈટની મુલાકાતે તિબેટિયન આધ્યાત્મિક વડા દલાઈ લામા આવવાના હતા એટલે ચાંપતો પોલીસ બંદોબસ્ત હતો.

અચાનક એક મહિલા કૉન્સ્ટેબલને શું સૂઝ્યું તે એ મોબાઈલમાં સોન્ગ વગાડવા માંડીઃ ઓ મેરી જાન, હેય ઓ મેરી જાન... ગીતના તાલે એક કૉન્સ્ટેબલ ખુલ્લૂ કુમારી નાચવા માંડી, જ્યારે બીજી એનો વિડિયો શૂટ કરવા લાગી. ટેમ્પલ કૉમ્પ્લેક્સની સિક્યોરિટી બાજુએ રહી ગઈ, મંદિર દેખાય એ રીતે ખુલ્લૂ કુમારીનો ડાન્સ મહત્ત્વનો બની ગયો. જેવો આ ડાન્સિંગ વિડિયો ખુલ્લૂ કુમારીએ ઈન્સ્ટાગ્રામ પર મૂક્યો કે ચારે બાજુ કાગારોળ મચીઃ પબ્લિક માટે મંદિરમાં મોબાઈલ લઈ જવાની મનાઈ, પણ પોલીસ જેવી જવાબદાર વ્યક્તિ મોબાઈલ પર ડાન્સિંગ વિડિયો બનાવે? આ કેવું?

પરિણામ? ઈન્ક્વાયરી બેસી અને ખુશ્બ કુમારીને સસ્પેન્ડ કરવામાં આવી.

નોકરિયાત વ્યક્તિએ સોશિયલ મિડિયાનો કેટલો અને કેવો ઉપયોગ કરવો જોઈએ?

છેલ્લા થોડા સમયથી પ્રચાર-પ્રસાર માધ્યમમાં આ વિશે ચર્ચા ચાલી રહી છે, દેશ-દુનિયામાં સોશિયલ મિડિયા પર બેજવાબદાર પોસ્ટ કરવાના લીધે અનેક લોકોની નોકરી ગઈ છે. અરે, ઘણાની તો કારકિર્દી પર પૂર્ણવિરામ મુકાઈ ગયું છે. એક વર્ગનું કહેવું છે કે નાની કે મોટી, જાણીતી કે અજાણી કંપનીમાં નોકરીમાં જોડાવાની સાથે જ એ કંપનીની શાખ જાળવવાની જવાબદારી કર્મચારીના શિરે આવી જાય છે. એણે એવું કંઈ જ ન કરવું જોઈએ, સોશિયલ મિડિયા જેવા જાહેર મંચ પરથી તો કદાપિ નહીં, કે જેથી કંપનીની આબરૂ જાય. જો આમ થાય તો કંપની તમારી સામે પગલાં લેતાં અચકાશે નહીં. બીજો વર્ગ કહે છે કે કંપનીનું આવું આત્યંતિક પગલું વાજબી ગણાય?