ചെറിയാന്റെ വീഞ്ഞും മോദീടെ ഗാരന്റിം

ഈ ശശിയണ്ണനും, രാജഗോപാൽജിയും എന്തിനുള്ള പുറപ്പാടാ? രാജേട്ടൻ പുകഴ്ത്തുന്നു. ശശിയണ്ണൻ പാദനമസ്കാരം ചെയ്യുന്നു.

- സുന്ദർജി

നാവടക്കൂ! പണിയെടുക്കു എന്നത് പണ്ട് അടിയന്തിരാവസ്ഥ കാലത്തെ പ്രധാന മുദ്രാവാക്യമായിരുന്നു എന്നോർക്കണം. അടിയന്തിരമായി അതു നടപ്പാക്കിയില്ലെങ്കിൽ, മന്ത്രിമാരുടെ കാര്യത്തിലെങ്കിലും പണി പാളാനുള്ള സാദ്ധ്യതകൾ തെളിഞ്ഞു കാണുന്നുണ്ട്. സാംസ്കാരിക തൊഴുത്തു വൃത്തിയാക്കുന്നതിന്റെ ചുമതലയുള്ള ചെറിയാൻ മന്ത്രി തന്നെ ചൊറിയാൻ നിൽക്കുന്നതിൽ ഒരു വൃത്തഭംഗം ഉണ്ടെന്നാണു കവി ഉദ്ദേശിക്കുന്നത് ശരീരം, ആത്മാവ്, പിശാച് എന്ന് പണ്ടാരോ ഒരു നോവലെഴുതിയിട്ടുണ്ട്. അതിന്റെ ചുവടുപിടിച്ച് കേക്ക്, വീഞ്ഞ്, രോമാഞ്ചം എന്ന ലൈനിൽ ഒരു സ്വയംകൃതാനർത്ഥം ഉണ്ടായിപ്പോയി. മൈക്കു കാണുമ്പോൾ. ചിലർക്കു രോമാഞ്ചമുണ്ടാവും വീഞ്ഞു കഴിച്ച ഇഫക്ടും ഉണ്ടാവും. അതൊരു സത്യമല്ലേ.

എന്റെ ചെറിയാൻ മന്ത്രി നിങ്ങളാ മുഖ്യമന്ത്രിയെ കണ്ടു പഠിക്ക്. അളന്നു തൂക്കിയാണ് അദ്ദേഹം സംസാരിക്കുന്നത്. പക്ഷേ കണ്ടതു മാത്രമേ പറയു. കാണാത്ത ഒരുകാര്യവും അദ്ദേഹം പറയില്ല. കണ്ണിൽ കണ്ടതേ വിശ്വസിക്കു! "കണ്ണിൽ കാൺമതു കളിയായ് മറയും, കാണാത്തതു നാമെങ്ങനെ അറിയും' എന്നാണല്ലോ കമുകറ പാടിയതു തന്നെ. ടി.വി, മീഡിയാ ഇതിലൊന്നും പുള്ളി വിശ്വസിക്കുന്നില്ല. മാദ്ധ്യമ സിൻഡിക്കേറ്റ്. മുഖ്യന്റെ വെടിക്കാരൻ (ഗൺമാൻ) അടിക്കാരൻ ആയത് ലോകം മുഴുവൻ കണ്ടു. പക്ഷേ മുഖ്യൻ കണ്ടിട്ടില്ല, അതുകൊണ്ടു കാണാത്തതു നാമെങ്ങനെ പറയും. അതാണ് വൈരുദ്ധ്യാത്മക ഭൗതികവാദം. എത്ര സിംപിളാണ് സംഗതി.

അപ്പോ വിഷ്വൽസോ? ആ വിഷ്വൽസൊക്കെ ടാമ്പേഡാണ്. ആർക്കു വേണേൽ ഒണ്ടാക്കാം. എന്നാ ഒണ്ടാക്കെ. മന്ത്രി സുഹൃത്തേ! ഞാനൊന്നു ചോദിക്കട്ടെ.