കള്ളന് കഞ്ഞി വെച്ചതുപോൽ

രാമചന്ദ്രാ, നീയാണെടാ ജീവിക്കാൻ പഠിച്ചവൻ..

- നൈന മണ്ണഞ്ചേരി 9446054809

തോളിലിരുന്ന പാമ്പിനെയെടുത്ത് വേലിയിലിട്ടെന്ന് പറഞ്ഞതു പോലെയായല്ലോ. ഭാര്യയുടെ പഴഞ്ചൊല്ല് കേട്ടപ്പോൾ ആ സമയത്ത് ചിരി വന്നെങ്കിലും രാവിലെ ഒരു കുടുംബ കലഹമുണ്ടാക്കണ്ട എന്നോർത്ത് ഞാൻ ചിരിച്ചില്ല. എന്തു പറഞ്ഞാലും ഒരു പഴഞ്ചൊല്ല് ഫിറ്റ് ചെയ്യുക ഭാര്യയുടെ പതിവാണ്. അത് തല തിരിച്ചേ പറയുതാനും.

“എന്താ നിങ്ങൾ ഒന്നും മിണ്ടാതെ കുരങ്ങൻ കടിച്ച ഇഞ്ചി പോലെ ഇരിക്കുന്നത്?' “എന്താ കുറവൻ ചത്ത കുരങ്ങിനെപ്പോലെ ഇരിക്കുന്നത്?' എന്ന് ചോദിച്ചില്ലല്ലോ എന്ന ആശ്വാസത്തോടെ ഞാൻ ഭാര്യയെ നോക്കി. ഇനി എന്തെങ്കിലും മിണ്ടാതിരുന്നാൽ അടുത്ത പഴഞ്ചൊല്ല് വരും.

ഞാനെന്തു ചെയ്യണമെന്നാ നീ പറയുന്നത്? “പോലീസിൽ ചെന്ന് കാര്യം പറയണം. എന്നിട്ട് വേണം അവരെന്നെ എടുത്തിട്ട് ഉരുട്ടുന്നത് നിനക്ക് കാണാൻ അല്ലേ?' എന്ന ഭാവത്തോടെ ഞാൻ ഭാര്യയെ നോക്കി. കട്ടവനെ കണ്ടില്ലെങ്കിൽ കണ്ടവനെ പിടിക്കുന്ന കാലമാ "അങ്ങനൊന്നുമില്ല, ആയിരം നിരപരാധികൾ രക്ഷപെട്ടാലും ഒരു കുറ്റവാളി പോലും ശിക്ഷിക്കപ്പെടരുതെന്നല്ലേ നിയമം? ദൈവമേ, ദേ വീണ്ടും അവളുടെ പഴഞ്ചൊല്ല്.. എന്തു ചെയ്യണം എന്നറിയാതെ ഞാൻ ധർമ്മസങ്കടത്തിലായി.