டெல்லியில் கவர்னர்! நடந்தது என்ன?

மூன்றுநாள் பயணமாக டெல்லி சென்றுவிட்டு சென்னைக்குத் திரும்பியுள்ளார் தமிழக கவர்னர் ஆர்.என்.ரவி. கேரளா, மணிப்பூர், பீஹார், ஒடிசா, மிசோரம் ஆகிய 5 மாநிலங்களின் கவர்னர்கள் மாற்றப்பட்டுள்ள நிலையில், தமிழக கவர்னரும் மாற்றப்படுவார் என்கிற எதிர்பார்ப்பு இருந்ததால் தமிழக அரசியலில் பரபரப்பு ஏற்பட்டது.

- இரா.இளையசெல்வன்

இந்த பயணத்தில் பிரதமர் மோடி, உள்துறை அமைச்சர் அமித்ஷா ஆகியோரை சந்தித்த கவர்னர் ரவி, ஒன்றிய அரசின் உயரதிகாரிகள் பலரையும் சந்தித்து ஆலோசனை பெற்றுள்ளார் என்கிறது டெல்லி வட்டாரங்கள்.

இது குறித்து விசாரித்தபோது, அரசு நிர்வாக ரீதியிலான பயணமாக இருந்தாலும், தனிப்பட்ட பயணமாக இருந்தாலும், தமிழக கவர்னர் டெல்லி வரும்போதெல்லாம் உயரதிகாரிகளை சந்திப்பதை வழக்கமாக வைத்திருக்கிறார்.

குறிப்பாக மத்திய உள்துறை, உளவுத்துறை, தேசிய புலனாய்வு முகமை உள்ளிட்ட உயரதிகாரிகளை தவறாமல் சந்திப்பார். அந்த சந்திப்பில் தமிழகத்தின் அரசியல் சூழல், தி.மு.க. அரசின் நிர்வாகம் குறித்த விவாதங்கள் அவசியம் இடம்பிடிக்கும். அதனையொட்டி, சில பல இன்ஸ்ட்ரக்ஷன்கள் கவர்னருக்கு கொடுக்கப்படும். அதனை உள்வாங்கிக் கொண்டு அதற்கேற்ப தனதுபணிகளைக் கவனிப்பார் கவர்னர்.

இந்த முறையும் உள்துறை, உளவுத்துறை, தேசிய புலனாய்வு முகமை உள்ளிட்ட உயரதிகாரிகளை சந்தித்ததோடு, வெளிநாட்டு இந்திய உளவு நிறுவனமான 'ரா' அமைப்பின் அதிகாரிகள், வருமான வரித்துறை அதிகாரிகள் மற்றும் தேசிய பாதுகாப்பு ஆலோசகர் அஜீத் தோவல் ஆகியோரையும் சந்தித்து விவாதித்துள்ளார் கவர்னர் ரவி.