ધ્યાનથી ચલાવજો: રસ્તા પર ચીકણી માટીથી ઘણાં ટુ-વ્હીલર લપસી પડ્યાં

સતત વરસતા વરસાદથી શહેરના મોટા ભાગના રોડ પર ચીકણી માટી ફેલાઈ જતાં વાહનચાલકો પરેશાનઃ ખાડાથી બચવું પણ મોટો પડકાર

અમદાવાદ, બુધવાર

શહેરમાં છેલ્લા દસ દિવસથી વરસાદી માહોલેજમાવટ કરી છે. ક્યારેક મેઘરાજા અમદાવાદ પર અનરાધાર હેત વરસાવીને જ્યાં ત્યાં પાણી-પાણી કરે છે તો ક્યારેક જોરદાર ઝાપટાં, તો અમુક વાર ઝરમર વરસાદ શહેરના રસ્તાને ભીના કરે છે. મ્યુનિ. તંત્ર દ્વારા રોજેરોજ રસ્તાની સફાઈ કરવામાં આવે છે. તેમ છતાં વરસાદી માહોલથી હજુ અનેક રસ્તા પર કાદવ-કીચડ જોવા મળે છે. આમ ચીકણી માટી રસ્તા પર ફેલાઈ હોય તેવા સમયે તમામ ટુ-વ્હીલરચાલકોએ તેમનાં વાહનને ભારે કાળજીપૂર્વક હંકારવાની જરૂર છે. રસ્તા પરની ચીકણી માટીના કારણે ઘણાં ટુ-વ્હીલરચાલકો લપસી પડ્યા છે. હજુ ઓછા-વત્તા પ્રમાણમાં વરસાદી માહોલ રહેવાનો હોઈ ટુ-વ્હીલરચાલકોએ આગામી દિવસોમાં વાહન ધ્યાનથી ચલાવવાં પડશે.