ગુજરાતની સંવેદનશીલ સરકારની સિદ્ધિઃ ૯૬ ટકા ઘરમાં નળથી જળ પહોંચાડ્યું

રાજ્ય સરકારે રાજ્ય વ્યાપી વોટર ગ્રીડનું નિર્માણ કરીને જૂથ પાણી પુરવઠા યોજનાઓને વેગ આપ્યોઃ ૧૩,૯૮૯ ગામને યોજના સાથે જોડવામાં આવ્યાં

અમદાવાદ, બુધવાર

ગુજરાતની સંવેદનશીલ સરકાર હંમેશાં લોકોની સુખાકારી અને સુવિધા માટે ચિંતિત હોય છે અને આ દિશામાં નક્કર કાર્યવાહી કરીને સમગ્ર દેશ માટે નવી દિશા ચિંધતી રહે છે. સાવ છેવાડાના માનવીની પણ કાળજી લઈને રાજ્યની સરકાર મુખ્યપ્રધાન ભૂપેન્દ્ર પટેલના મક્કમ છતાં મૃદુ નેતૃત્વમાં સતત કાર્યરત છે. ગુજરાત સરકારે જનતાના હિતમાં અમલમાં મૂકેલી સૌથી અસરકારક યોજનાઓમાંની એક ‘નલ સે જલ’ યોજના છે, જેના થકી આજે રાજ્યનાં અંદાજે ૯૬ ટકા ઘરમાં પીવાનું પાણી પહોંચી રહ્યું છે.

આપણે સૌ સારી રીતે જાણીએ છીએ તેમ હવા અને પાણી એ મનુષ્યજીવનની મુખ્ય જરૂરિયાત છે. પાણી વિના જીવન શક્ય નથી. પાણી વનસ્પતિ સૃષ્ટિ માટે પણ અત્યંત જરૂરી છે. આમ, જળ એ જ જીવન છે. પૃથ્વી પરના મોટા ભાગના જીવો પાણી પર જ નિર્ભર હોય છે, તેમાંય શુદ્ધ પાણીથી અનેક બીમારીઓથી બચી શકાય છે. શરીર અને મન પવિત્ર જળથી શુદ્ધ થઈ જાય છે. પુરાણો અનુસાર ધરતી પર પાણીનું વજન ધરતી કરતાં ૧૦ ગણું વધારે છે. પાણી એ આપણા માટે પરમેશ્વરનો પ્રસાદ છે.

મનુષ્યજાતિના અસ્તિત્વ માટે પાણી એક મોટું પરિબળ છે. પાણી વિનાની પૃથ્વીની કલ્પના પણ અશક્ય છે. આપણા જીવન માટે શ્વાસ એટલી જ જરૂરિયાત પાણી છે. ખેતી, પશુપાલન, ઉદ્યોગો, બાંધકામ જેવાં અનેક ક્ષેત્રોમાં પાણીની જરૂર પડે છે. આપણે વિશ્વમાં વિકસેલી સંસ્કૃતિઓનો અભ્યાસ કરીએ તો વિશ્વની તમામ સંસ્કૃતિઓ નદી કિનારે વિકસિત થયેલી છે. ભગવાન મહાવીરે પણ પાણીનો ઘીની જેમ ઉપયોગ કરવાની શીખ આપેલી છે.