સવારથી અમદાવાદના અનેક વિસ્તારોમાં વીજળીના કડાકા સાથે ધોધમાર વરસાદ

દક્ષિણ ગુજરાતમાં આગામી પાંચ દિવસ સુધી ભારે વરસાદની હવામાન વિભાગની આગાહીં: શહેરમાં ઠેરઠેર વરસાદ પડતાં લોકોએ ઠંડકનો અનુભવ કર્યો

અમદાવાદ, ગુરુવાર

વહેલી સવારથી અમદાવાદ અને આસપાસના વિસ્તારોમાં વીજળીના કડાકા-ભડાકા સાથે ધોધમાર વરસાદ તૂટી પડ્યો છે. ખાસ કરીને શહેરના જોધપુર, પ્રહ્લાદનગર, વેજલપુર, મકતમપુરા, રામોલ, વટવા સહિતના અનેક વિસ્તારોમાં મેઘરાજાની સવારી ધામધૂમથી આવી પહોંચી છે. હવામાન વિભાગના જણાવ્યા અનુસાર આગામી દિવસોમાં અમદાવાદ અને આસપાસના વિસ્તારોમાં ભારેથી અતિભારે વરસાદ થવાની પણ સંભાવના છે.

બંગાળની ખાડીમાં લો પ્રેશર રચાતાં રાજ્યમાં ચોમાસું ફરીથી સક્રિય થાય તેવી શક્યતા છે. ગઇ કાલે અમદાવાદના કુબેરનગર, સરદારનગર, શાહીબાગ, માધુપુરા, વાડજ, ઉસ્માનપુરા સહિતના વિસ્તારમાં મુશળધાર વરસાદ પડ્યો હતો. જેના કારણે કેટલીક જગ્યાઓમાં પાણી પણ ભરાઇ ગયાં હતાં. મોડી રાતે પડેલા વરસાદ બાદ થયેલી ઠંડકથી અમદાવાદીઓએ રાહતનો શ્વાસ લીધો છે.