અઢી વર્ષ બાદ ૯ ઓગસ્ટથી કાંકરિયામાં મિની ટ્રેન દોડશે

સીએમના હસ્તે રૂ. ૧૩.૨૩ કરોડનાં કામનાં લોકાર્પણ, રૂ. ૫૩.૨૮ કરોડનાં કામનાં ભૂમિપૂજન કરાશે

અમદાવાદ, શનિવાર

કાંકરિયા લેકફ્રન્ટની શરૂઆતથી દોડતી મિની ટ્રેન બાળકોને ખૂબ જ આકર્ષી રહી છે. પહેલાં તંત્રે અટલ એક્સપ્રેસ દોડાવી હતી. ત્યાર બાદ સ્વર્ણિમ જયંતી એક્સપ્રેસ દોડાવાઈ હતી, જોકે છેલ્લા અઢી વર્ષથી મિની ટ્રેનના પાટા નવા નખાઈ રહ્યા હોઈ તેને બંધ રાખવામાં આવી હતી. હવે નવા પાટા સાથેના ટ્રેક ઉપરાંત આરસીસી ડ્રેનેજ લાઈન તૈયાર થઈ ગઈ છે. આશરે રૂ. ૩.૯૨ કરોડના આ પ્રોજેક્ટનું લોકાર્પણ આગામી તા. ૯ ઓગસ્ટના રોજ થવાનું છે એટલે શ્રાવણના તહેવારોમાં ભૂલકાંઓ બંને મિની ટ્રેનનો આનંદ માણી શકશે.

મુખ્યપ્રધાન ભૂપેન્દ્ર પટેલના હસ્તે કાંકરિયા મિની ટ્રેન દોડતી કરાશે. ઉપરાંત રૂ. ૭પ કરોડના ખર્ચે તૈયા૨ કરાયેલા ખોખરા રેલવે ઓવરબ્રિજનું પણ લોકાર્પણ કરાશે. ખોખરા રેલવે ઓવરબ્રિજને નવા રંગરૂપ અપાઈ ગયાં હોઈ લગભગ અઢી વર્ષ બાદ લોકોની હાડમારીનો અંત આવશે. આ બ્રિજને પહોળો કરીને ચાર લેનનો બનાવાયો છે તેમજ ગોમતીપુર તરફ પણ એક પાંખ ઉતારાઈ છે.