‘હર ઘર તિરંગા’માં પ્રજાના ટેક્સના પૈસાથી ૧૯૨ કોર્પોરેટર મફતમાં રાષ્ટ્રધ્વજ આપશે

આજે મળનારી સ્ટેન્ડિંગ કમિટીમાં શાસક ભાજપ દરખાસ્ત મૂકશેઃ કોંગ્રેસ પણ કોર્પોરેટરના બજેટફાળામાંથી રાષ્ટ્રધ્વજ આપવા સંમત

અમદાવાદ, બુધવાર

આગામી તા. ૧૩થી ૧૫ ઓગસ્ટ સુધી દેશનાં પ્રત્યેક ઘરમાં દેશની આન-બાન અને શાનનાં પ્રતીક સમા તિરંગાને ગર્વથી લહેરાવાશે. આ માટે વિશેષરૂપથી 'હર ઘર તિરંગા' અભિયાનને સમગ્ર ભારતમાં જોશભેર અને ઉત્સાહભેર હાથ ધરાયું છે. આમાં સ્વાભાવિકપણે ગુજરાતની આર્થિક રાજધાનીની ઓળખ ધરાવનાર અમદાવાદ મ્યુનિ. કોર્પોરેશન પણ હોંશે હોંશે જોડાયું છે. અમદાવાદનાં લગભગ ૧૬.૫ લાખ ઘરમાં નાગરિકો ગૌરવભેર રાષ્ટ્રધ્વજ ફરકાવી શકે તે માટે તંત્ર આગળ આવ્યું છે. મ્યુનિ. કોર્પોરેશન દ્વારા ઠેર ઠેર તિરંગા દીઠ રૂ. ૩૦ના ભાવથી તેનું વેચાણ કરતાં કેન્દ્રો ઊભાં કરાયાં છે. હજારો લોકોમાં સ્વયંભૂ તિરંગો લેવાનો થનગનાટ જોવા મળ્યો છે. હવે શહેરના કોર્પોરેટરો પણ નાગરિકો માટેની સામાજિક જવાબદારીને ધ્યાનમાં રાખીને જાગૃત બન્યા છે. ૧૯૨ કોર્પોરેટરોનાં વાર્ષિક બજેટમાંથી કોર્પોરેટર દીઠ રૂ. ૫૦ હજારની રકમ ફાળવીને તેમાંથી તિરંગો વેચાતો લઈ પોતાના વોર્ડમાં લોકોમાં મફતમાં વિતરણ કરવાની દિશામાં શાસકો દ્વારા ચક્રો ગતિમાન કરાયાં છે.