મેઘરાજાએ છોટાઉદેપુરને ધમરોળ્યું: પાવી જેતપુરમાં સૌથી વધુ સવા આઠ ઈંચ વરસાદ

રાજ્યમાં વરસાદનો ચોથો રાઉન્ડ ભારે બને તેવી શક્યતાઃ ૧ ઓગસ્ટથી બંગાળના ઉપસાગરમાં ડીપ ડિપ્રેશન થઈ શકે છે

અમદાવાદ, શનિવાર

રાજ્યના કેટલાક વિસ્તારમાં વરસાદનું જોર ઘટ્યું છે, જોકે મધ્ય ગુજરાતના છોટાઉદેપુર જિલ્લાને મેઘરાજાને રીતસરનો ધમરોળી નાખ્યો છે. આ જિલ્લાના પાવી જેતપુરમાં છેલ્લા ૨૪ કલાકમાં સૌથી વધુ સવા આઠ ઈંચ વરસાદ વરસ્યો છે, જ્યારે બોડેલીમાં આઠ ઈંચ વરસાદ વરસતા લોકો તોબા પોકારી ઊઠ્યા છે.

મધ્ય ગુજરાતમાં છોટાઉદેપુર જિલ્લાની જીવાદોરી ગણાતી ઓરસંગ નદી બે કાંઠે થઈ છે. આ નદીએ રૌદ્ર સ્વરૂપ ધારણ કરવાથી નીચાણવાળા વિસ્તારમાં જળબંબાકાર થયો છે. ઉપરવાસમાં ભારે વરસાદ થતાં દાંતીવાડા ડેમના છ દરવાજા ખોલી બનાસ નદીમાં ૩૦,૦૦૦ ક્યુસેક પાણી છોડવામાં આવ્યું છે. આ ડેમ ૮૬.૬૨ ટકાથી પણ વધુ ભરાઈ ચૂક્યો છે. બનાસ નદીમાં પાણી છોડાતાં આસપાસનાં ગામોમાં હાઈ એલર્ટ જાહેર કરાયું છે.