આફત હજુ ટળી નથીઃ ૩થી ૯ ઓગસ્ટ સુધી રાજ્યમાં ભારે વરસાદ પડી શકે છે

આજે પણ અમદાવાદ સહિત રાજ્યના વિવિધ વિસ્તારમાં વરસાદ પડવાની શક્યતાઃ છેલ્લા ૨૪ કલાકમાં ૧૬૧ તાલુકામાં ઝરમરથી અઢી ઈંચ જેટલો વરસાદ વરસ્યો

અમદાવાદ, સોમવાર

શહેર સહિત રાજ્યભરમાં વરસાદનું જોર હળવું થયું છે. જોકે મધ્ય ગુજરાતના પાવી જેતપુર અને બોડેલી જેવા વિસ્તારોને વચ્ચે મેઘરાજાએ ધમરોળી કાઢ્યા હતા, પરંતુ સાર્વત્રિક મેઘકહેર ઓછો થયો હોઈ પ્રજા અમુક અંશે હાશકારો અનુભવે છે. તેમ છતાં ચોથા રાઉન્ડના વરસાદ માટે પણ લોકોએ તૈયાર રહેવું પડશે. આગામી તા. ૩થી ૯ ઓગસ્ટ સુધી રાજ્યમાં ફરી ભારે વરસાદ પડી શકે તેમ છે.

ત્રીજા રાઉન્ડના વરસાદથી રાજ્યભરમાં ભારે ખાનાખરાબી થઈ છે. ખાસ કરીને સૌરાષ્ટ્ર અને કચ્છમાં લીલો દુષ્કાળ પડે તેવી ભીતિ સર્જાઈ છે. જોકે વરસાદ અટકવાનું નામ લેતો નથી, કેમ કે એક પછી એક નવા રાઉન્ડની શક્યતાઓ સતત ઊભી થઈ રહી છે. હવે ચોથા રાઉન્ડ માટે પણ લોકોએ તૈયાર રહેવું પડશે તેમ હવામાન નિષ્ણાતો જણાવે છે. આ હવામાન નિષ્ણાતોનો એવો દાવો છે કે આગામી તા. ૩થી ૯ ઓગસ્ટની વચ્ચે રાજ્યમાં ભારે વરસાદ પડશે, જેમાં અમુક વિસ્તારમાં મેઘરાજા બઘડાટી બોલાવી શકે છે.