રાજ્યમાં હવે હળવોથી મધ્યમ વરસાદ પડશેઃ હવામાન વિભાગની આગાહી

મચ્છરજન્ય અને પાણીજન્ય રોગચાળો વધ્યો: છેલ્લા ૨૪ કલાકમાં ૧૨૮ તાલુકામાં વરસાદ

મંગળવાર અમદાવાદ,

શહેર સહિત રાજ્યમાં વરસાદનું જોર ખાસ્સું એવું ઘટ્યું છે. વરસાદના છેલ્લા અને ત્રીજા રાઉન્ડમાં સૌરાષ્ટ્ર, કચ્છ અને દક્ષિણ ગુજરાતમાં મેઘરાજાએ ભારે તારાજી સર્જી હતી. મુશળધાર વરસાદ પડવાથી આ વિસ્તારોનાં નદી-નાળાં છલકાઈ ગયાં હતાં અને ખેતરોમાં પાણી ભરાઈ ગયાં હતાં, જેના કારણે જગતનો તાત ભારે મુશ્કેલીમાં મુકાઈ ગયો છે. જોકે ભારે વરસાદના પગલે ગુજરાતમાંથી જળસંકટ મહદ્અંશે દૂર થયું છે, કેમ કે અનેક ડેમ પાણીથી છલકાઈ ઊઠ્યા છે. હવે રાજ્યમાં હવામાન વિભાગની આગાહી જોતાં આગામી તા. ૬ ઓગસ્ટ સુધી હળવોથી મધ્યમ પ્રકારનો વરસાદ પડશે એટલે હજુ પણ લોકો વરસાદનો ધમાકેદાર ચોથો રાઉન્ડ શરૂ થાય તેની પહેલાં થોડીક નિરાંત અનુભવી શકશે.

સ્થાનિક હવામાન વિભાગની આગાહી મુજબ આજે અમદાવાદમાં વરસાદ પડી શકે છે. આ ઉપરાંત સમગ્ર જિલ્લા, ગુજરાતના તમામ સૌરાષ્ટ્રના અમરેલી, ભાવનગર, ગીર સોમનાથ, જૂનાગઢ, દીવ તેમજ કચ્છ જિલ્લામાં હળવોથી મધ્ય પ્રકારનો વરસાદ પડશે.