પોલીસને મદદ કરવા માટે આવેલા બે યુવકો પોલીસવાનમાં રીલ્સ બનાવતાં જબરા ફસાયા

યુવકોએ પોલીસવાનમાં વીડિયો ઉતાર્યો હતો, ત્યાર બાદ રીલ્સ બતાવીને સોશિયલ મીડિયામાં વાઈરલ કર્યો હતોઃ ડીજેનો સામાન ઉતારવા માટે પોલીસે બે યુવકોની મદદ લીધી હતી

અમદાવાદ, મંગળવાર

આજે યુવાઓમાં રીલ્સ બનાવવાનો ક્રેઝ એટલી હદે વધી ગયો છે કે જાણે સોશિયલ મીડિયામાં લાઇક્સ અને કોમેન્ટ વધુમાં વધુ મેળવવા માટે રીતસર રેસ લાગી હોય છે. યુવાઓ રીલ્સ બનાવવા માટે કોઇ પણ હદ સુધી જતા હોય છે, જેના કારણે ઘણી વખત કાયદાના સકંજામાં પણ આવી જતા હોય છે. પોલીસને મદદ કરવા માટે ગયેલા બે યુવકોને પોલીસવાનમાં બેસીને રીલ્સ બનાવવાનો શોખ એટલી હદે ભારે પડ્યો કે બંનેને હવે લોકઅપની હવા ખાવાના દિવસો આવી ગયા છે. અસારવાના બે યુવકોએ પોલીસવાનમાં બેસીને રીલ્સ બનાવી હતી, જે સોશિયલ મીડિયામાં વાઈરલ થતાં પોલીસે બંનેની ધરપકડ કરી લીધી છે.