ઉત્તર ભારતમાં કાતિલ ઠંડીઃ યુપીમાં ધુમ્મસ છવાયું

હવામાન વિભાગના જણાવ્યા અનુસાર આગામી કેટલાક દિવસો સુધી ઉત્તરપ્રદેશમાં સતત ધુમ્મસ જોવા મળશે

ઉત્તર ભારતમાં હવે કાતિલ ઠંડી પડી રહી છે. લોકો ઠંડીથી ઠૂંઠવાઇ રહ્યા છે ત્યારે ઉત્તરપ્રદેશ ધુમ્મસની ઝપટમાં છે. હવામાન વિભાગના જણાવ્યા અનુસાર આગામી કેટલાક દિવસો સુધી ઉત્તરપ્રદેશમાં સતત ધુમ્મસ જોવા મળશે, જ્યારે દિલ્હી-એનસીઆરમાં કોલ્ડવેવના કારણે ઠંડી લોકોને પરેશાન કરી રહી છે. દિલ્હીમાં ઠંડીનું મોજું યથાવત્ છે. જમ્મુ-કાશ્મીરના ઘણા વિસ્તારમાં પારો માઈનસથી નીચે છે. હિમાચલમાં હિમવર્ષાની શક્યતા વધી છે. રાજસ્થાનનાં પાંચ શહેરોમાં તાપમાન માઇનસ ચાર ડિગ્રી સુધી ગગડ્યું છે, જેના કારણે બરફ જામી ગયો છે. આજે કુલુ અને લાહૌલસ્પીતિનાં ઊંચા શિખરો પર હળવી હિમવર્ષા થઈ શકે છે. ઉત્તર ભારતમાં ફૂંકાતા ઠંડા પવનોની અસર મધ્યપ્રદેશ અને છત્તીસગઢમાં પણ જોવા મળી છે. બંને રાજ્યનાં નવ શહેરોમાં તાપમાન ચાર ડિગ્રીથી નીચે ગગડ્યું છે. હરિયાણાના હિસારમાં તાપમાન ૦.૬ ડિગ્રી સુધી નોંધાયું હતું. આજે આંધ્ર પ્રદેશ-તામિલનાડુ અને ઓડિશામાં વરસાદની શક્યતા છે.