கொதிக்கும் மழுவும் காப்பியமும்

தமிழில் ஐம்பெருங்காப்பியங்களில் மூன்றாவதாகச் சொல்லப்படுவது, சிந்தாமணி.

- பி.என்.பரசுராமன் 

இதன் ஆசிரியர், 'திருத்தக்கதேவர்'. இவர் சமணத்துறவி. படிக்க வேண்டிய அறநூல்களை எல்லாம் சந்தேகமறக் கற்றுத் தேர்ந்தவர். வட மொழியிலும், தமிழ்மொழியிலும் நன்கு தேர்ச்சி பெற்றவர். துறவுநெறி மேற்கொண்டு வாழ்ந்து வந்த திருத்தக்க தேவர், குருபக்தியில் தலை சிறந்தவராக இருந்தார். துறவியாக இருந்தாலும், உலக அறிவு நிறைந்த உத்தமமான கவிஞராகவும் விளங்கினார், திருத்தக்க தேவர். இவர் காலம், 10-ஆம் நூற்றாண்டு. இரண்டாம் நூற்றாண்டில் தோன்றிய சிலப்பதிகாரம், மணிமேகலை எனும் காப்பியங்களுக்கு இணையாகத் திருத்தக்கதேவரின் 'சிந்தாமணி' நூல் வைத்துப் போற்றப்படுகிறது என்றால், திருத்தக்க தேவரின் உயர்வு, எந்த அளவிற்கு இருந்தது என்று விளங்கும். சிறு வயதிலிருந்தே, உலகப்பற்றைத் துறந்து உத்தமமான துறவியாக இருந்த திருத்தக்க தேவர், இன்ப நூலான 'சிந்தாமணி'யை எழுதியதே, ஓர் அற்புதமான வரலாறு.