തൃപ്രയാറപ്പന്റെ തിരുനടയിൽ

രാമനാമ മുഖരിതമായ കർക്കടകം. തൃപ്രയാറിലെ ദശരഥ നന്ദനൻ സന്നിധിയിൽ ഭക്തി തോരാമഴ പോലെ പെയ്തിറങ്ങുന്നു

- സുരാജ് പി. വി

തിരിമുറിയാതെ പെയ്തു നിറയുകയാണ് കർക്കടകം. മലയാളികൾക്ക് ഇത് രാമായണമാസം കൂടിയാണ്. പഞ്ഞവും പരാതിയും തീരാൻ രാമനാമം ചൊല്ലുന്ന മനസ്സുകൾ, ഓട്ടുകിണ്ടിയിൽ തീർഥവും ഇലച്ചീന്തിൽ തുളസിയും ദശപുഷ്പങ്ങളും വെച്ച് ശീവോതി നിറയുന്ന മച്ചകങ്ങൾ. വീട്ടകങ്ങളിലും അമ്പലവഴികളിലും രാമായണശീലുകൾ നിറയുന്ന കാലം. എല്ലാ വഴികളും ചെന്നെത്തുന്നത് തൃപ്രയാറപ്പന്റെ നടയിലേക്കാണ്. തേവരെ കണ്ട് മനസ്സ് നിറയാതെ ഈ ദുരിതകാലം മറികടക്കുവതെങ്ങനെ.

നിറഞ്ഞൊഴുകുകയാണ് തീവ്രാ നദി. മഴയെ മറികടന്ന വെയിലേറ്റ് തിളങ്ങുന്ന ഓളങ്ങൾ കിഴക്കേനടയുടെ മച്ചിൽ പ്രതിഫലിക്കുന്നു. കതിനാവെടികളുടെ പ്രകമ്പനം കേട്ടുകൊണ്ട് തൃപ്രയാറപ്പന്റെ സന്നിധിയിലേക്ക് കയറി. മുൻപിൽ വലിയ ബലിക്കല്ല് പേരുപോലെ സാമാന്യം വലുതാണ്. ഇളകിക്കൊണ്ടിരുന്ന ഈ കല്ല് ഉറപ്പിച്ചത് നാറാണത്ത് ഭ്രാന്തനാണന്നാണ് ഐതിഹ്യം. ആനക്കൊട്ടിലും ശീവേലിപ്പുരയും കടന്നാൽ ചെല്ലുന്നത് നടയിലേക്കാണ്. ഒറ്റനില വട്ടശ്രീ കോവിലിനകത്ത് നിറദീപങ്ങൾക്ക് നടുവിൽ ചതുർബാഹുവായ ശ്രീരാമൻ. കിഴക്കു ദർശനമായുള്ള അഞ്ജനശിലാവിഗ്രഹം. ഒരുകൈയിൽ തന്റെ വില്ലായ കോദണ്ഡം, മറ്റൊന്നിൽ സുദർശനം, മുന്നിലെ വലതുകൈയിൽ അക്ഷമാലയും ഇടതുകൈയിൽ പാഞ്ചജന്യവും. ഖരവധത്തിന് ശേഷമുള്ള ഉഗ്രഭാവത്തിലാണ് പ്രതിഷ്ഠ.  കൗസല്യാത്മജനെ ശാന്തനാക്കാനായി ഇരുവശവും ശ്രീദേവിയും ഭൂമീദേവിയുമുണ്ട്.