നിളാതീരത്തെ നെയ്ത്തുശാല

കുത്താമ്പുള്ളിയിൽ നെയ്ത വസ്ത്രങ്ങളില്ലാതെ മലയാളിക്കും മാവേലിക്കും ഓണക്കാലം പൂർത്തിയാകില്ല....

- സൂരജ് സുകുമാരൻ

കർക്കടകമാസ മഴമേഘങ്ങൾ മണ്ണിലേക്കിറങ്ങി നൃത്തം ചെയ്യുന്ന പകലിലാണ് വില്വാദ്രിനാഥന്റെ മണ്ണിലേക്കുള്ള യാത്ര തുടങ്ങിയത്. കർക്കടകത്തിന്റെ മഴത്തണുപ്പ് പൊതിഞ്ഞത് കൊണ്ടാണോ എന്നറിയില്ല തിരുവില്വാമലയുടെ വീഥികളിൽ ആൾത്തിരക്ക് കുറവാണ്. ബസ്സിലെ കണ്ടക്ടർ ചേട്ടൻ ടിക്കറ്റെടുക്കാൻ നേരം കുത്താമ്പുള്ളിയിലേക്കാണെന്ന് പറഞ്ഞപ്പോൾ കുശലം ചോദി ച്ചു തുടങ്ങി. ഓണ ഒരുക്കങ്ങളെ കുറിച്ച് അറിയാനാണെന്ന് പറഞ്ഞപ്പോൾ അവിടത്തെ തിരക്കിനെ കുറിച്ചൊരു സൂചന തന്നു. സീസണായാൽ കേരളത്തിന്റെ പലഭാഗത്തുനിന്നും നെയ്ത്തിന്റെ തലസ്ഥാനത്തേക്ക് ഒഴുകിയെത്തുന്ന ജനാവലിയെ കുറിച്ചും അവിടെ നടക്കുന്ന ലക്ഷങ്ങളുടെ കച്ചവടത്തെ കുറിച്ചുമെല്ലാം അസ്സൽ പാലക്കാടൻ ഭാഷയിൽ വിശദീകരിച്ചു. തിരുവില്വാമല അങ്ങാടിയും കടന്ന് നെയ്ത്തിന്റെ രാജവീഥിയിലേക്ക് വാഹനം ഇൻഡിക്കേറ്ററിട്ടു. തിരുവില്വാമലയിൽ നിന്ന് കുത്താമ്പുള്ളിയിലേക്കുള്ള റോഡിന്റെ തുടക്കം മുതൽ തറിയുടെ താളം വഴിയോരങ്ങളിൽ നിന്ന് മുഴങ്ങിത്തുടങ്ങും. വഴിയോരത്തെ ആദ്യ കടയുടെ മുന്നിലെത്തിയപ്പോൾ ബെല്ലടിച്ചു, അവിടെ ഇറങ്ങിക്കോളാൻ പറഞ്ഞു “നിങ്ങളേ, ഇവട് നടന്ന് കാഴ്ചകൾ കണ്ട് വരൂ, എന്നാൽ മാത്രമേ കുത്താമ്പുള്ളിയെ അറിയാനാകൂ..'' ഉപദേശവും നൽകി കണ്ടക്ടർ ചേട്ടനും ബസ്സും നിളാതീരത്തെ ചെന്നുതൊടാൻ പാഞ്ഞു.

കസവുടുത്ത നടവഴികൾ....