പുള്ളി പുലിയാണ്

കത്തി കൊണ്ടല്ല ഗോപാലൻ പുലിയെ കൊന്നത്. പൊറുതിമുട്ടിയ ജീവിതം കൊണ്ടാണ്

- വി.എസ്. അസ്ഹറുദീൻ

ഗോപാലൻ ചേട്ടൻ ആള് പുലിയാന്നേ... സ്വയരക്ഷയ്ക്കായി പുലിയെ വെട്ടിക്കൊന്ന കർഷകൻ ഗോപാലന്റെ മാങ്കുളത്തെ വീട്ടിലേക്കുള്ള യാത്രയ്ക്കിടയിൽ ജീപ്പ് ഡ്രൈവർ ആവേശം കൊണ്ടു. മാങ്കുളത്തു നിന്നും മൂന്ന് കിലോമീറ്ററിലധികമുണ്ട് ചിക്കണം കുടിയെന്ന ഗോപാലന്റെ പുലിയൂരിലേക്ക് വഴിനീളെ തുടർച്ചയായ കയറ്റവും ഇറക്കവും. വണ്ടിയോടിക്കുന്നതിനിടയിൽ ഡ്രൈവർക്ക് പറയാനുള്ളതത്രയും ആനയും പുലിയും കാട്ടുപന്നിയും കർഷകർക്കുണ്ടാക്കുന്ന പ്രശ്നങ്ങൾ. കഥകൾ പറഞ്ഞു തീരുന്നതിന് മുൻപ് തന്നെ ചിക്കണംകുടിയിലെത്തി, കയറ്റം കയറി ജീപ്പ് നിന്നു. ഇനി നടക്കണം. ഇടുങ്ങിയ റോഡിലൂടെ അല്പം നടന്നപ്പോഴേക്കും ഗോപാലന്റെ വീട് തെളിഞ്ഞു. പുലിയുടെ ആക്രമണത്തെത്തുടർന്ന് ഇപ്പോഴും വിശ്രമത്തിലാണ് ഗോപാലൻ. വലത് കൈയ്ക്ക് പ്ലാസ്റ്റർ ഇട്ടിരി ക്കുന്നു. ഇടത് കൈയിൽ പുലി യുടെ നഖം കൊണ്ട് പാടുകൾ. മൽപിടുത്തത്തിനിടയിൽ വയറിൽ പലയിടത്തും ക്ഷതമേറ്റിരിക്കുന്നു. നാട്ടിലെ വീരപുരുഷനായി മാറിയ ഗോപാലൻ ആക്രമണകഥയുടെ ചുരുളഴിക്കാൻ തുടങ്ങി...

കാട് ചതിച്ചില്ല, പക്ഷേ...