ഖൽബിലെ റസിയ

മൈലാഞ്ചി മൊഞ്ചുമായി മലയാളികളുടെ മനംകവർന്ന നായിക, രാധിക വിശേഷങ്ങളുടെ ജാലകം തുറക്കുന്നു

- സുരജ് സുകുമാരൻ

കാമുകനായ മുരളിയെ കൊന്ന സുകുവിനോട് പകവീട്ടാനെത്തിയ റസിയ. തിരിച്ചറിവുകൾക്കൊടുവിൽ മുരളിയുടെ മാതാപിതാക്കൾക്കൊപ്പം ജീവിക്കാൻ അവൾ തീരുമാനിക്കുന്നിടത്താണ് 2006-ൽ പുറത്തിറങ്ങിയ ക്ലാസ്മേറ്റ്സ്' എന്ന സൂപ്പർഹിറ്റ് സിനിമ അവസാനിക്കുന്നത്. മടങ്ങിവരാം എന്നുപറഞ്ഞ് സുകു കൈവീശി യാത്രയാകുന്ന ആ അവസാന സീൻ ഇന്നും മലയാളി മനസ്സിൽ മായാതെ കിടക്കുന്നുണ്ട്. അതിന് പിന്നാലെ റസിയയും ദുബായിലേക്ക് പറന്നത് നമ്മളറിഞ്ഞില്ല. ദുബായിലെ ആൾക്കൂട്ടത്തിൽ തട്ടത്തിൻ മറയില്ലാതെ മിന്നിമറയുന്ന റസിയയെ കണ്ടിട്ടുണ്ടാകും മലയാളികൾ പലരും. തട്ടം മലയാളിക്ക് ഒരു വീക്ക്നെസ്സ് ആയത് ക്ലാസ്മേറ്റ്സിലെ റസിയയുടെ മൊഞ്ച് കണ്ടത് മുതലാണ്. ആ ഇഷ്ടം തിരിച്ചറിഞ്ഞത് കൊണ്ടുതന്നെയാണ് നടി രാധിക ഇൻസ്റ്റഗ്രാം പ്രൊഫൈലിലെ പേര് രാധിക റസിയ എന്നാക്കിയത്. വിവാഹശേഷം ദുബായിലേക്ക് ചേക്കേറിയ രാധിക ഇടവേളയ്ക്ക് ശേഷം വീണ്ടും മലയാള സിനിമയിൽ സജീവമാകുകയാണ്. മഞ്ജുവാര്യർ കേന്ദ്രകഥാപാത്രമാകുന്ന ആയിഷ' യിലൂടെ. പഴയ ഓർമകളും പുതിയ വിശേഷങ്ങളുമായി ദുബായിൽ നിന്ന് രാധിക സംസാരിക്കുന്നു.

വിവാഹശേഷം അഭിനയം നിർത്തിയതാണോ, അതോ സിനിമക്കാർ അങ്ങനെ വിചാരിച്ചതാണോ ?

ദുബായിലേക്ക് ചേക്കേറിയതാണ്. ഭർത്താവിന് അവിടെയാണ് ജോലി. വിവാഹശേഷം സിനിമയിൽ അഭിനയിക്കുന്നില്ലെന്ന തീരുമാനമൊന്നും എടുത്തിരുന്നില്ല. ദുബായിലേക്ക് മാറിയതിനാൽ ഞാൻ ഇനി അഭിനയിക്കില്ലെന്ന് പലരും വിചാരിച്ചു. അതിനാലാകാം സിനിമകളിലേക്ക് ആരും വിളിച്ചില്ല. അതിനിടയിൽ ഷാജി എൻ. കരുണിന്റെ 'ഓള്' എന്ന സിനിമയിൽ അഭിനയിച്ചു. ഒരു കൊമേഴ്സ്യൽ സിനിമയല്ലാത്തതിനാൽ വേണ്ടത്ര ജനശ്രദ്ധ നേടിയില്ല. 'ആയിഷ' യിലൂടെ വീണ്ടും മലയാളസിനിമയിൽ സജീവമാകുന്നു എന്നതിൽ ഏറെ സന്തോഷമുണ്ട്.

അപ്രതീക്ഷിതമായാണ് ആയിഷ യിലേക്ക് വിളിവന്നത്. നല്ലൊരു കഥാപാത്രമുണ്ട് അഭിനയിക്കുന്നോ എന്ന് ചോദിച്ചപ്പോൾ കഥ കേട്ടുനോക്കി. ഇഷ്ടപ്പെട്ടു. അതോടെ ചെയ്യാം എന്ന് വാക്കുകൊടുത്തു. ദുബായിൽ തന്നെയായിരുന്നു ഷൂട്ടിങ്. മഞ്ജുച്ചേച്ചി (മഞ്ജുവാര്യർ) ആണ് കേന്ദ്രകഥാപാത്രത്തെ അവതരിപ്പിക്കുന്നത്. നിഷ എന്നാണ് എന്റെ കഥാപാത്രത്തിന്റെ പേര്. ഏറെ നാളുകൾക്ക് ശേഷമുള്ള ഈ വരവ് പ്രേക്ഷകർ സ്വീകരിക്കും എന്നാണ് പ്രതീക്ഷ. 'ആയിഷ'യുടെ റിലീസിന് പിന്നാലെ കൂടുതൽ സിനിമകളിൽ അവസരം പ്രതീക്ഷിക്കുന്നു.