ഈ യാത്രയിൽ വഴികാട്ടികളില്ല

ഒന്നും തലയിലേറ്റാതെ ഒട്ടും തലക്കനമില്ലാതെ അപ്പൂപ്പൻതാടി പോലെ രജിഷ വിജയൻ

- ബൈജു പി. സെൻ

സിനിമയുടെ മായികലോകത്തേക്ക് ഒറ്റയ്ക്ക് നടന്നുവന്നവളാണ് രജിഷ വിജയൻ.

കരിക്കിൻ വെള്ളം പോലെ മനസ്സുകുളിർപ്പിച്ച അനുരാഗത്തിന്റെ കഥ പറഞ്ഞ ആദ്യചിത്രത്തിലൂടെ രജിഷ മികച്ച നടിയാണെന്ന് കാലം അടയാളപ്പെടുത്തി. തുടർന്നുള്ള യാത്രകൾ എളുപ്പമായിരുന്നില്ല... ഉറച്ച നിലപാടുമായി ലക്ഷ്യത്തിലേക്കുള്ള യാത്ര. ജൂൺ എന്ന സിനിമയാണ് രജിഷയുടെ കരിയർ മാറ്റിമറിച്ചത്. തമിഴ്, തെലുഗു ഭാഷകളിൽ മുൻ നിരനായകന്മാർക്കൊപ്പം അവസരം തുറന്നത് ആ ചിത്രമായിരുന്നു.

"മധുര മനോഹര മോഹം' എന്ന പുതിയ ചിത്രം തിയേറ്ററിലെത്തുമ്പോൾ, പ്രേക്ഷകരോടുള്ള തന്റെ ഉത്തരവാദിത്തം ഏറുകയാണെന്ന് തിരിച്ചറിയുന്നു രജിഷ.

ഓരോ ചിത്രത്തിലും തികച്ചും വ്യത്യസ്തമായ കഥാപാത്രങ്ങൾ... പുതുമകൾക്കുവേണ്ടി രജിഷ അത്രയും പരിശ്രമിക്കാറുണ്ടോ?

കഥ കേട്ട് സിനിമ ചെയ്യാമെന്ന തീരുമാനം ചൂതാട്ടം പോലെയാണ്. ഒത്താൽ ഒത്തു. സിനിമയുടെ ജനപ്രീതി പ്രവചിക്കാൻ കഴിയില്ല. കഥ നന്നായാൽ മാത്രം സിനിമ നന്നാകണമെന്നില്ല.  തിരക്കഥ, സംഭാഷണം, പശ്ചാത്തല സംഗീതം, സഹതാരങ്ങൾ, റിലീസ് സമയത്തെ കാലാവസ്ഥ തുടങ്ങി ഒട്ടേറെ കാര്യങ്ങൾ നന്നായി വരുമ്പോൾ മാത്രമേ സിനിമയും കഥാപാത്രങ്ങളും ശ്രദ്ധിക്കപ്പെടൂ... സിനിമയുടെ ഇത്തരം കാര്യങ്ങളിലേക്ക് ഒരുപാട് ചിന്തിച്ചാൽ പണിയെടുക്കാതെ വീട്ടിലിരിക്കാൻ തോന്നും. അത്രയും റിസ്കാണ്. കഥ കേൾക്കുമ്പോൾ പുതുമയും കഥാപാത്രത്തിന്റെ വ്യത്യസ്തതയും മാത്രമേ ഞാനിപ്പോൾ നോക്കാറുള്ളൂ. ബാക്കിയെല്ലാം ഭാഗ്യം പോലെ കടന്നുവരുന്ന ഘടകങ്ങളാണ്.

തിരഞ്ഞെടുത്ത സിനിമകളെക്കാൾ കൂടുതൽ ഉപേക്ഷിക്കേണ്ടിവന്നിട്ടുണ്ടാവും അല്ലേ?

 അത് സ്വഭാവികമാണ്. കേൾക്കുന്ന കഥകളിലെല്ലാം അഭിനയിച്ചാൽ അത് തീർക്കാൻ ഒരു വർഷം മതിയാകില്ല. അപ്പോൾ നമ്മൾ സെലക്ടീവാകും.

ഒരു വർഷം മലയാളത്തിൽ എത്ര സിനിമകൾ, നമുക്ക് അതിന്റെയെല്ലാം ഭാഗമാകാൻ കഴിയില്ലല്ലോ...

പ്രേക്ഷക പ്രതികരണങ്ങളിൽനിന്ന് എന്തെങ്കിലും പഠിക്കാറുണ്ടോ?

ഓരോ സിനിമയുടെയും റിലീസ് ദിവസംതന്നെ പ്രേക്ഷക പ്രതികരണങ്ങൾ അടുത്തറിയാൻ ഞാൻ ശ്രമിക്കാറുണ്ട്. നല്ല ചിത്രങ്ങളെ നല്ലതെന്നും മോശമായതിനെ ആ രീതിയിലും വിലയിരുത്തുന്ന കുറെ സുഹൃത്തുക്കൾ എനിക്കുണ്ട്. തെറ്റ് തിരുത്തി മുന്നോട്ടു പോവുകയാണ് എന്റെ രീതി.