உணவுக் கலாச்சாரத்திற்கு கிடைத்த மதிப்பான விருது!

அரேபியன், பான் ஆசியன், கான்டினென்டல் என பல உணவகங்கள் இருந்தாலும், வீட்டில் அம்மாவின் கைப்பக்குவத்தில் ஒரு பிடி சாம்பார் சாதம், உருளைக்கிழங்கு கறிக்கு ஈடு இணை என்றுமே கிடையாது.

- ஷன்மதி

அரேபியன், பான் ஆசியன், கான்டினென்டல் என பல உணவகங்கள் இருந்தாலும், வீட்டில் அம்மாவின் கைப்பக்குவத்தில் ஒரு பிடி சாம்பார் சாதம், உருளைக்கிழங்கு கறிக்கு ஈடு இணை என்றுமே கிடையாது. காரணம், ஒரு வாரம் ஓட்டல் உணவுகளை தொடர்ந்து சாப்பிட முடியாது. ஆனால் 365 நாளும் வீட்டு உணவுகளை சாப்பிட நம் மனம் ஏங்கும். அந்த ஏக்கத்தினை கடந்த ஒரு வருடமாக பூர்த்தி செய்து வருகிறார் அரவிந்த். இவரின் பூக்லே செயலி மூலம் வீட்டு கைமணத்துடன் உணவினை நம் வீட்டிற்கே கொண்டு வந்து தருகிறார். இவரின் இந்த திட்டத்திற்கு உணவுத் துறையின் மிகவும் மதிப்புமிக்க Food Connoisseurs India விருது கிடைத்துள்ளது. சினிமாவிற்கு ஆஸ்கார் போல் உணவுத் துறைக்கு இந்த விருது. தன்னுடைய செயலியின் முதல் விருது பயணத்தை பகிர்ந்து கொண்டார் சென்னையை பூர்வீகமாகக் கொண்ட அரவிந்த்.

"பொறியியல் படிச்சிட்டு அமெரிக்காவில் அமேசான் மற்றும் மைக்ரோசாஃப்ட் நிறுவனத்தில் வேலை பார்த்தேன். நான் ஒவ்வொரு முறை விடுமுறைக்காக சென்னைக்கு வரும் போது எல்லாம் அம்மா எனக்குப் பிடிச்ச உணவினை சமைச்சு தருவாங்க. ஆனால் கோவிட் போது அம்மாவை நான் இழக்க நேரிட்டது. அம்மா நல்லா சமைப்பாங்க. அவங்க சாப்பாட்டில் அன்பு கலந்து இருப்பதை உணர முடியும். அப்பதான் நானும் அப்பாவும் ஒன்றை உணர்ந்தோம். அவங்க சாப்பாட்டினை நாங்கள் சுவைத்து சாப்பிடுவோமே தவிர நல்லா இருக்குன்னு சொன்னதில்லை. ஆனா, அவங்க அதுபத்தி கேட்டதும் இல்லை. காரணம், சாப்பாடு நல்லா இருந்தா நானும் சரி அப்பாவும் சரி எக்ஸ்ட்ரா இரண்டு பிடி அதிகம் சாப்பிடுவோம். அதைப் பார்த்தே அம்மா புரிந்துகொள்வாங்க. அவங்க அமெரிக்கா வந்தாலும் அங்கும் வெளி சாப்பாடு வேணாம்னு சொல்லி அவங்களே சமைப்பாங்க. அப்படித்தான் ஒவ்வொரு வீட்டில் இருக்கும் அம்மாகளுக்கு தனிப்பட்ட கைப்பக்குவம் மற்றும் சுவை இருக்கும். அந்த நினைவுகளை மீட்டுக் கொடுத்தால் என்ன என்று தோன்றியது" என்றவர், பூக்லே ஆரம்பித்தது குறித்து விவரித்தார்.