அரங்கநாத சுவாமி கோயில்

திருச்சி ஸ்ரீரங்கத்தில் அமைந்துள்ள அரங்கநாத சுவாமி கோயில் 108 'வைணவத் திருத்தலங்களுள் முதல் திருத்தலம். காவிரி மற்றும் கொள்ளிடம் ஆறுகளால் சூழப்பட்டு ஏழு சுற்று மதில்களுக்குள் அமைந்துள்ளது.

- திலகவதி

இச்சுற்று மதில்களில் வாயில்களாக 21 கோபுரங்கள் அமைக்கப்பட்டுள்ளன. இவற்றுள் மிகப் பெரிதான தெற்கு ராஜகோபுரம் 236 அடி உயரத்துடன், தென்னிந்தியாவி லேயே பெரிய கோபுரமாக விளங்குகின்றது. இந்த கோபுரம் 17ம் நூற்றாண்டில் கட்ட துவங்கினாலும், 1987ல்தான் முழுமையாகக் கட்டி முடிக்கப்பட்டது.

திருவரங்கம் கோயில் விமானம் பிரம்மாவின் தவத்தால் திருப்பாற்கடலிலிருந்து சுயம்பாக தோன்றியது. பிரம்மா விமானத்திற்கு நித்திய பூஜை செய்ய சூரியனை நியமித்தார். சூரிய குலத்தில் பிறந்த அரசன் இட்சுவாகு இந்த விமானத்தை தனது தலைநகரமாகிய அயோத்திக்கு வழிபடக் கொண்டு சென்றான். ராமர் இவ்விமானத்தை விபீஷணனுக்கு பரிசாகக் கொடுத்தார். விபீஷணன் விமானத்தை தன் தலையில் சுமந்து இலங்கைக்கு எடுத்துச் செல்லும் வழியில் காவிரியாற்றை கடக்கும் போது அங்கு விமானத்தை இறக்கி வைத்துவிட்டு சிறிது நேரம் இளைப்பாறினான். பின்னர் விமானத்தை எடுக்க முயன்ற போது, அவனால் அதை எடுக்க முடியவில்லை. அரங்க நாதர் காவிரிக்கரையில் தான் தங்கி இருக்க விரும்புவதாக விபீஷணனிடம் அசரீரியாக கூறினார். மேலும் அவருக்காக 'தென்திசை இலங்கை நோக்கி' பள்ளிகொண்டருள்வதாக உறுதியளித்தார். பின்னர் தர்மவர்ம சோழன் அவ்விமானத்தைச் சுற்றி கோயில் எழுப்பி வழிபாடு செய்தான்.

கோயிலின் மதில் சுவர்கள் ஒன்றுக்குள் ஒன்றாக ஏழு சுற்றாக அமைக்கப்பட்டுள்ளன. மையப் பகுதியில் அரங்கநாத சுவாமி கோயில் தெற்கு நோக்கிய வண்ணம் அமைந்துள்ளது. கோயிலிலிருந்து நான்கு திசைகளிலும் வெளிப்புறம் நோக்கிச் செல்லும் வகையில் மதில்களில் ஒரே வரிசையில் கோபுர வாயில்கள் காணப்படுகின்றன. ராஜகோபுரத்தோடு கூடிய பிரதான வாயில் தெற்குப் பக்கத்தில் அமைந்துள்ளது.