ജോലി തട്ടിപ്പും മനുഷ്യക്കടത്തും

വിദേശ കുടിയേറ്റം സംബന്ധിച്ച വിവരങ്ങളും വായനക്കാരുടെ സംശയങ്ങൾക്കുള്ള മറുപടിയും

- അജിത് കോളശ്ശേരി സിഇഒ, നോർക്ക റൂട്ട്സ്

മലയാളികൾക്ക് അത്ര പരിചിതമല്ലാതിരുന്ന ലക്ഷ്യ സ്ഥാനങ്ങളായിരുന്നു സിംഗപ്പൂരും മലേഷ്യയും ഒഴികെയുള്ള ആസിയാൻ രാജ്യങ്ങളായ ബ്രൂണെ, വിയറ്റ്നാം, കംബോഡിയ, ലാവോസ്, മ്യാൻമർ, ഫിലിപ്പീൻസ് തുടങ്ങിയവ.

എന്നാൽ കോവിഡിന്റെ രണ്ടാം ഘട്ടം മുതൽ തായ്ലൻഡിലെ ബാങ്കോക്ക് വഴി മ്യാൻമർ, കംബോഡിയ, ലാവോസ് എന്നീ രാജ്യങ്ങളിലെ മേക്കോങ് പ്രദേശങ്ങളിലെ ചൂതാട്ട കേന്ദ്രങ്ങളിലേക്കുള്ള (Scamming Centre) മനുഷ്യക്കടത്തു വർധിച്ചിരിക്കുകയാണ്.

എല്ലാത്തരം നിയമവിരുദ്ധ പ്രവർത്തനങ്ങൾക്കും കുപ്രസിദ്ധി ആർജിച്ചവയാണ് ഈ കേന്ദ്രങ്ങൾ. കംപ്യൂട്ടർ പരിജ്ഞാനമുള്ള അഭ്യസ്തവിദ്യരായ ചെറുപ്പക്കാരെയാണ് ലക്ഷ്യമിടുന്നത്. അതാണ് ഇന്ത്യയിലേക്ക്, പ്രത്യേകിച്ചും കേരളത്തിലേക്ക് അവർ ആകൃഷ്ടരാകാൻ കാരണം.

പലപ്പോഴും തൊഴിൽ വെബ്സൈറ്റുകൾ വഴിയും നവ മാധ്യമങ്ങൾ വഴിയും ഉദ്യോഗാർഥികളെ തിരഞ്ഞെടുത്തു വ്യാജ ഓഫർ ലെറ്റർ നൽകിയാണ് ഇരകളെ വിദേശത്തേക്കു കൊണ്ടുപോകുന്നത്.