સમજ અને સતર્કતા છે જરૂરી

કોરોના સંક્રમણના બીજા વૈવની હાડમારી દરમિયાન સોશિયલ મીડિયા પર અનેક પ્રકારના સંદેશાઓ, સૂચનો, માર્ગદર્શન અને સાવચેતીની ચેતવણી ઉચ્ચારતી વાતોનો અવિરત પ્રવાહ ચાલી રહ્યો છે. બેશક, તેમાં કેટલીક નકારાત્મક વાતો હોય છે, પરંતુ મહઅંશે લોકોને ઉપયોગી બની રહેવાની ભાવના સાથે અનુભવી ડૉક્ટરો, વૈદ્ય તેમજ સામાજિક સેવાના ક્ષેત્રમાં પ્રવૃત્ત લોકો ઘણી સારી વિગતોથી લોકોને માહિતગાર કરે છે. એકંદરે આપત્તિના આ સમયે લોકોના માનસિક જુસ્સાને ટકાવી રાખવાનું અને તેમને હતાશાની ગર્તામાં ધકેલાતા અટકાવવાનું કામ કરે છે. બે વૉટ્સએપ મેસેજ અહીં આપ્યા છે. એ સ્વયં સ્પષ્ટ છે. એકમાં કોરોના સંક્રમણના ટેસ્ટ અને સારવાર દરમિયાન વપરાતી સંજ્ઞાઓની સમજ આપી છે. તો બીજામાં એક વિદેશવાસી ભારતીયના ભારતમાં તેમને થયેલા વિધેયાત્મક અનુભવની વાત આપણા આરોગ્ય વ્યવસ્થા તંત્ર વિશે તુલનાત્મક રીતે જુદા પ્રકારે વિચારવાનો સંકેત આપે છે.

- આરતી વિમલ પારીખ

મિત્રો જે લોકો હમણા RT-PCR ટેસ્ટ કરાવે છે, તેમનો રિપોર્ટ પોઝિટિવ હોય તો તે રિપોર્ટમાં CT Value લખેલી હોય છે. કોઈની ૭ કોઈની ૧૭ કોઈની ૨૮. ઘણા લોકો આ વેલ્યુના આધારે ડૉક્ટરો સાથે દલીલમાં પણ ઊતરતા હોય છે. ઘણા લોકો આ વેલ્યુને ૧૦૦માંથી મળતા માસ સાથે પણ સરખાવતા હોય છે. એટલે CT વેલ્યુને લઈને ઘણી ગેરમાન્યતાઓ છે.