વામા વિશ્વ આરોગ્ય

સૂકામેવાની તાસીર અને તેનો ઉપયોગ

- હેતલ ભટ્ટ

શિયાળો હોય કે ઉનાળો કે પછી ચોમાસું બારે મહિના જુદા-જુદા સૂકામેવા આરોગવા સ્વાસ્થ્ય માટે લાભપ્રદ માનવામાં આવે છે. સ્વાસ્થ્યને લઈને આવેલી જાગૃતિને કારણે લોકો હવે સૂકામેવા રાત્રે પલાળીને સવારે તેને આરોગતા હોય છે. તેઓ તેમના નિત્યક્રમમાં સૂકામેવાને સ્થાન આપે છે. કાજુબદામ, પિસ્તા, ખજૂર, અંજીર, અખરોટ, દરાખ, જરદાલુ વગેરે તો જાણીતા સૂકામેવા છે જ, પણ હવે તો હેઝલનટ ને પાઇનનટ જેવા જુદા-જુદા સૂકામેવા પણ બજારમાં ઉપલબ્ધ બન્યા છે. જોકે દરેક વ્યક્તિએ પોતાની તાસીર અનુસાર સૂકામેવા આરોગવા જોઈએ. રસપ્રદ વાત એ છે કે જેવી રીતે દરેક વ્યક્તિની તાસીર જુદી-જુદી હોય છે એ જ રીતે દરેક સૂકામેવાની પણ જુદી-જુદી તાસીર હોય છે. ઉદાહરણ તરીકે મોટા ભાગના લોકો માને છે કે ખજૂરની તાસીર ગરમ છે. ઉનાળા અને ચોમાસા દરમિયાન ખજૂરના ઉપયોગ પર સંતુલન જાળવવું, કારણ કે ખજૂર ગરમ છે અને ગરમીની ઋતુમાં ગરમ તાસીરની વસ્તુ આરોગીએ તો સ્વાસ્થ્યને નુકસાન થાય. જોકે વાતમાં ટ્વિસ્ટ એ છે કે આયુર્વેદ અનુસાર ખજૂર ઠંડી તાસીરના છે. ખજૂર સ્વભાવે ગરમ હોય છે એવી ભ્રામક માન્યતા લોકોની વચ્ચે પ્રવર્તે છે. હકીકતે ખજૂર ઠંડા છે.