ദുഃഖിക്കാൻ ഞാനില്ല

ഒരിക്കൽ വീഴ്ത്തിയ വിധി പിന്നീട് വാരിപുണർന്ന് ഉയർത്തെഴുന്നേൽപ്പിക്കും എന്ന ഓർമപെടുത്തലാണ് മിന്നാ ജോസിന്റെ ജീവിതം

പിതാവ് മരിച്ച പെൺകുട്ടി ! എന്ന വാക്കിനൊപ്പം കടുത്ത സഹതാപവും കൽപ്പിക്കപ്പെട്ടിരിക്കുന്നു. ആ വാക്കിൽ നിന്നും കണ്ണീർകഥകളുടെ എപ്പിസോഡു കൾ മെനഞ്ഞെടുക്കാൻ കാത്തു നിൽക്കുന്ന സമൂഹം. ജീവിതം വഴിമുട്ടിപോയ പെൺകുട്ടിയുടെയും അമ്മയുടെയും നൊമ്പരം കേൾക്കാ നായി കാതോർക്കും. എന്നാൽ, കൗമാരത്തിൽ തന്നെ കിടപ്പാടം പോലും നഷ്ടപ്പെട്ട പതിനെട്ടുകാരി മറ്റുചില കഥകളാണ് നമ്മുക്ക് പറഞ്ഞു തരുന്നത്. കോളജിലേക്കുള്ള ഒരുക്കത്തിനിടയിൽ ബുക്കിനും പൊതിച്ചോറിനുമൊപ്പം ട്രോളി ബാഗിൽ നിറച്ച കുർത്തകളും ടോപ്പുകളുമായി സംരംഭകയുടെ കുപ്പായം അവളെടുത്തണിഞ്ഞു. കടം നികത്തി. വീണ്ടും പഠിച്ചു. ഒപ്പം, ട്രോളി ബാഗുമായുള്ള കച്ചവടവും. ബിരുദാനന്തര ബിരുദം പൂർത്തിയാക്കി. ബഡ്ജറ്റ് റേഞ്ചിൽ കുർത്തികൾ നൽകുന്ന കൊച്ചിയിലെ ആദ്യ സ്ഥാപനം ആ കൗമാരക്കാരി തുറന്നു.'മിന്നാ ജോസ്' എന്ന സംരംഭകയുടെ ജീവിതത്തിന് നക്ഷത്രത്തേക്കാൾ ശോഭയേറെയാണ്. പ്രതീക്ഷകളല്ല, പാകപ്പെടലാണ് ജീവിതമെന്നു പറഞ്ഞു തന്ന പെൺകൊടി. ഒറ്റപ്പെടലുകളെ അതി ജീവിച്ചു ' ദ ഡോട്ട്സ് 'എന്ന ബ്രാന്റ് പടുത്തുയർത്തിയ മിന്നാ ജോസാണ് നവവത്സരത്തിലെ എന്റെ സംരംഭ ത്തിന്റെ മുഖക്കുറി. ഇരുളിൽ വഴുതി പോയ ജീവിതത്തെ തിരിച്ചു പിടിച്ച കഥകൾ.