હું વ્યવસાયથી આર્કિટેક્ટ પણ દિલથી નાટ્યકાર છું

આર્કિટેક્ટના અભ્યાસ પછીની કારકિર્દીની દોડમાં નાટક પડતું મુકાઈ ગયું, પણ ‘અંતરનાદ’ સાંભળીને ફરી નાટ્યપ્રવૃત્તિ શરૂ કરનાર અમદાવાદના કબીર ઠાકોર તેમના રંગકર્મની ખાટીમીઠી વાતો અહીં માંડે છે.

- કબીર ઠાકોર

આમ તો ભણતર તેમ જ વ્યવસાયથી હું આર્કિટેક્ટ. તેમ છતાં લોકો મને એક આર્કિટેક કરતાં થિયેટર પ્રેક્ટિસનર તરીકે વધારે ઓળખે છે. સામાન્ય રીતે કંટાળાજનક વ્યવસાય સાથે સંકળાયેલા લોકો અભિવ્યક્તિ કે આનંદ માટે કળા સાથે જોડાતા હોય છે, પણ મારા કિસ્સામાં તો મારું વ્યાવસાયિક કામ પણ અત્યંત સર્જનાત્મક અને આનંદ આપે તેવું છે. તેમ છતાં મને કોઈ પૂછે તો હું એમ જ કહ્યું કે, ‘હું વ્યવસાયથી આર્કિટેક્ટ ચ પણ દિલથી નાટ્યકાર છું.’ ડિઝાઇન કરવું રસપ્રદ ખરું પણ એમાં લાગણીઓની અભિવ્યક્તિની કોઈ જગ્યા નથી. તમે સાવ ત્રાહિત વ્યક્તિ માટે સર્જન કરો છો. ક્લાયન્ટની રુચિ, આર્થિકસ્થિતિ અને વિશેષતઃ એમની મરજી મુજબ આખા સર્જનનો ખેલ રચાય છે. ચકચકિત દુનિયાનું સર્જન કરનાર મોટા ભાગના આર્કિટેક્ટ કદાચ આજુબાજુની દુનિયાથી બેખબર હોય છે. ખેર આ બધી ડહાપણભરી ફ્લિસૂફી બહુ મોડેથી સમજાઈ છે.

તો સ્વાભાવિક જ એવો પ્રશ્ન થાય કે એક આર્કિટેક્ટને નાટ્યકારની ઓળખ મળી કઈ રીતે?