પુનરાવર્તન

કર્મવીરસિંહે સુવર્ણાબહેનને કહ્યું હતું, ‘આપણી દીકરીનું નસીબ ખૂલી ગયું છે. ક્યાં નાના ગામમાં રહેતા મારા જેવા સામાન્ય માસ્તરની દીકરી નંદિની અને ક્યાં કરોડપતિ જયદીપસિંહનો એક માત્ર વારસ સદાશિવસિંહ?’

- પ્રફુલ્લ કાનાબાર

આખરે એ રાત આવી ચૂકી હતી જેને લોકો સુહાગરાત કહે છે. બેડરૂમને ગુલાબનાં ફૂલોથી સજાવવામાં આવ્યો હતો. બંગલાના વિશાળ ખંડની દીવાલોમાં આતુરતા હતી. ખંડમાં અઢળક કુંવારી આશાઓ અને તમન્નાઓ વિખરાયેલી પડી હતી. ફૂલોભરી શય્યામાં નવોઢા નંદિની સદાશિવની આતુરતાથી રાહ જોઈ રહી હતી.

સદાશિવ અને નંદિનીનો માત્ર એક મહિના પહેલાંનો જ પરિચય. નંદિનીના ગામડાના ઘરે સદાશિવ તેના ધનવાન પિતા જયદીપસિંહ સાથે તેને જોવા આવ્યો હતો. મધ્યમવર્ગની સંસ્કારી નંદિનીના રૂપ અને ખાસ તો તેની સાદગીથી તે આકર્ષાયો હતો. બંને એકાંતમાં મળ્યાં ત્યારે સદાશિવે તેના ઘોડેસવારીના શોખની વિસ્તારથી વાત કરી હતી. શહેરમાં પિતા સાથે ફાઇનાન્સ અને શેરબજારનું મોટું કામકાજ ધરાવતો સદાશિવ ઘોડેસવારી જેવો શોખ ધરાવતો હતો એ વાત નંદિનીને નવાઈ પમાડી રહી હતી. નંદિની કોઈ પરીકથા સાંભળે તેમ વાચાળ પ્રકૃતિના સદાશિવને સાંભળી રહી હતી. નંદિનીના ચહેરા પરની આશ્ચર્યની રેખાઓ જોઈને સદાશિવ બોલ્યો હતો, ‘તમને નવાઈ લાગે છે ને? પણ એમાં નવાઈ પામવા જેવું ક્યાં છે? દરબારનો દીકરો છું. શોખ પણ એ પ્રમાણે જ હોય ને? હાઈવે પર અમારું મોટું ફાર્મ હાઉસ છે ત્યાં છ પાણીદાર ઘોડા પણ રાખ્યા છે. આ તો નાછૂટકે પૈસા કમાવા માટે ફાઇનાન્સ અને શેરબજારની લાઇન પકડી છે.'

નંદિનીના પિતા કર્મવીરસિંહ મોંઘેરા મહેમાનોને વળાવવા માટે તેમની મોંઘી કાર સુધી શેરીની બહાર સુધી આવ્યા હતા.

કારમાં બેસતી વખતે જ જયદીપસિંહ બોલ્યા હતા, ‘ કર્મવીરસિંહ, અમને તમારી દીકરી પસંદ છે.' દીકરીના બાપ તરીકે કર્મવીરસિંહે બંને હાથ જોડીને વિવેક દર્શાવ્યો હતો.

કર્મવીરસિંહ ઘરમાં પ્રવેશ્યા ત્યારે તેમની આંખમાં હર્ષનાં આંસુ હતાં. તેમણે સુવર્ણાબહેન સામે જોઈને કહ્યું હતું, ‘આપણી દીકરીનું નસીબ ખૂલી ગયું છે. ક્યાં નાના ગામમાં રહેતા મારા જેવા સામાન્ય માસ્તરની દીકરી નંદિની અને ક્યાં કરોડપતિ જયદીપસિંહનો એક માત્ર વારસ સદાશિવસિંહ?'

એંસી લાખની મોંઘી કાર શહેર તરફ પૂરપાટ દોડી રહી હતી.

આજે ડ્રાઇવર રજા પર હતો. સદાશિવ કાર ચલાવી રહ્યો હતો.‘પપ્પા, તમે ઇશારો કર્યો એટલે મેં તેમના ઘરની બહાર નીકળતા જ તમને ગ્રીન સિગ્નલ આપી દીધું '

‘કેમ તારે વિચારવા માટે સમય જોઈતો હતો?’