સિંહ કે શિયાળ?

હાર્દિકે ફેસબુકમાં લોગ-ઇન કર્યું. ઍની ટાઇમલાઇન પર પાસ થયેલા મિત્રો પર અભિનંદનની વર્ષા થઈ રહી હતી. એકાદ ક્ષણ માટે એને થયું કે, ઝડપથી ટાઇમલાઇન સ્ક્રોલ કરી નાખું પણ એ ન કરી શક્યો.

‘સિંહ કે શિયાળ?' સ્વરાએ હાર્દિકને મેસેજ કર્યો. સ્વરાનો મેસેજ હાર્દિકે નોટિફિકેશન બારમાંથી વાંચી લીધો. મેસેજનો જવાબ આપવાની હિંમત એ ક્ષણે હાર્દિકમાં ન હતી. સ્વરાની સિંહ કે શિયાળની રમત એને હંમેશાં ગમતી, પણ આજે એને સ્વરાના શબ્દો પસંદ ન પડ્યા. એણે આસપાસ કામ કરી રહેલા સહકર્મચારીઓ તરફ નજર દોડાવી. એ ઊભો થઈને બારી પાસે ગયો.

‘ શિયા..ળ.. એ મૂક પપ્પા શું કરે છે?' અંતે હાર્દિકે સેડ ઇમોજી સાથે રિપ્લાય કર્યો. હાર્દિકના ચેટ બોક્સમાં ટાઇપિંગ-ટાઇપિંગ લિંક થતું હતું, પરંતુ એનો મેસેજ આવતો ન હતો. હાર્દિકે થોડીવાર પછી મોબાઇલની સ્ક્રીન લોક કરી નાખી. બહાર અંધારું ઊતરવાની તૈયારીમાં હતું. બારીની બહાર હાંફ્યા શહેરની હાંમાં હાર્દિકની હાંફે થોડો વધારો કર્યો. જોકે છેલ્લાં પાંચેક વર્ષથી હાર્દિક હપ્તે હપ્તે શહેરની હાંફ વધારવામાં યોગદાન આપી રહ્યો હતો. એનું ધ્યાન દૂર દેખાતી ઇમારત પર સ્થિર થયું. ત્યાં રહેનારા એકેય વ્યક્તિને પોતાના પરિણામથી ફેર પડ્યો હશે? હાર્દિકને પ્રશ્ન થયો. બીજી જ ક્ષણે એને સ્પષ્ટ ઉત્તર મળી પણ ગયો. આંખો જોઈ શકે એટલા દરેક વ્યક્તિને જોઈને હાર્દિકે મનોમન દરેકને પ્રશ્ન પૂછ્યો કે, પોતાનાથી સી.એ. ફાઇનલ પાસ થાય કે ન થાય એનાથી એમને ફેર પડશે? એ પોતાની જાત પર હસી પડ્યો.

‘લંચ પછીથી તું મને ભાસતો નથી. ભાભી સાથે ઝઘડીને આવ્યો છે કે શું?’ હાર્દિકના ખભા પર જયેશે હાથ મૂકીને પૂછ્યું.

‘ના રે. કેમ?’ હાર્દિક થોડો ઝંખવાણો પડ્યો.

‘મોબાઇલમાં ભાભીના કેટલા મિસ્ડકોલ છે એ જો તો જરા.'

‘શું કહ્યું સ્વરાએ?’ એણે પૂછવા ખાતર પૂછી લીધું.

‘તારી રાહ જોવાય છે. બાપાને મેથી મારવા માટે કાંઈક વિષય તો મળવો જોઈએ ને.' જયેશે વળતો જવાબ ન આપ્યો. ‘ચીલ યાર. સી.એ. ન થવાયું તો આભ થોડી તૂટી પડવાનું છે. ફ્રેશ સી.એ. રિફ્રૂટ કરવા માટે કંપની તને મૂકે છે. એમનાથી વધુ સ્કિલ તારામાં છે. એનાથી વિશેષ શું જોઈએ?’ જયેશે વાત બદલાવવાનો પ્રયત્ન કર્યો.

‘સેલરી અને વર્ક પ્રોફાઇલ તો એકાઉન્ટન્ટના મળે છે ને!' હાર્દિકથી બોલાઈ જવાયું.

‘ચાલ ચા પીવા. સાંજે ચા પીવાની તને આદત છે ને!'

‘સોરી યાર. તું નીકળી જા. મને ઘરનાં બે-ચાર કામ છે.' હાર્દિકે વાત વાળવાનો પ્રયત્ન કર્યો.