કચ્છની ધરતી પર ઊગી રહ્યું છે ‘પ્લાયવૂડ'

દક્ષિણ ભારતમાં ઊગતાં મલબાર નીમ – મિલિયાદુબિયા નામના વૃક્ષની ખેતી કચ્છમાં શરૂ થઈ છે. આ વૃક્ષનાં લાકડાંમાંથી પ્લાયવૂડ બને છે. ગાંધીધામમાં દેશનો સૌથી મોટો પ્લાયવૂડ ઉદ્યોગ છે. ભવિષ્યમાં આ ઉદ્યોગ માટે જરૂરી લાકડું ઘરઆંગણે જ મળી રહેશે તેવી આશા જન્મી છે.

- સુચિતા બોઘાણી કનર

દુષ્કાળ સાથેનો જુગ જૂનો નાતો ધરાવતા કચ્છના ખેડૂતો તદ્દન વિપરીત પરિસ્થિતિમાં અન્ય વિસ્તારના ખેડૂતો કરતાં વધુ જહેમત ઉઠાવીને નવા નવા પાકનું સફળતાપૂર્વક વાવેતર કરે છે. બાગાયતી ખેતીમાં તો આ જિલ્લો રાજ્યનો પ્રથમ નંબરનો જિલ્લો બન્યો જ છે, પરંતુ હવે તો જંગલના પાક ગણાતાં વૃક્ષોનું પણ મોટાપાયે વાવેતર કરીને તેમાં પણ આગેકૂચ કરી રહ્યો છે. જેમાંથી પેપર બનાવવા માટેનો પલ્પ બનાવાય છે, દીવાસળી બને છે તે મિલિયાદુબિયાના વૃક્ષમાંથી પ્લાયવૂડ પણ ખૂબ સારું બની શકે છે. આવા મિલિયાદુબિયા એટલે કે મલબાર નીમલીમડોના નામે ઓળખાતાં વૃક્ષોની ખેતી પણ કચ્છના ખેડૂતોએ શરૂ કરી છે. સાથે સાથે જિલ્લામાં નીલગિરિનાં વૃક્ષોનું વાવેતર પણ થઈ રહ્યું છે. દુકાળિયો રણપ્રદેશ મનાતા કચ્છમાં દક્ષિણ ભારતમાં લીલોતરી વધારનારાં વૃક્ષો પણ ઊગી રહ્યાં છે. ખેતી માટે નર્મદાનું પાણી પણ હવે જિલ્લાના અનેક વિસ્તારોમાં પહોંચવામાં છે ત્યારે ખેડૂતો બમણાં ઉત્સાહથી નવા નવા પાકોનું વાવેતર કરવાના પ્રયત્ન કરશે તે નક્કી છે.

કચ્છમાં છેલ્લા બે દાયકામાં વરસાદનું પ્રમાણ વધ્યું છે. નર્મદાનાં પાણી પણ ખેડૂતોને મળવા લાગ્યા છે. હવે ધરતીપુત્રો આકાશી મહેર પર આધાર રાખવાના બદલે પોતે પણ જળસંચય કરીને ખેતીમાં તેનો ઉપયોગ કરી રહ્યા છે. પહેલાં માત્ર પરંપરાગત પાકો લેનારા ખેડૂતો હવે વિવિધ પ્રકારના બાગાયતી પાક લઈ રહ્યા છે. ઠંડા પ્રદેશમાં થનારાં સફરજન અને અમેરિકન કેસર અહીં પાકી રહ્યાં છે. ત્યારે દક્ષિણ ભારતમાં થનારાં મલબાર નીમ કે મિલિયાદુબિયા અને નીલિંગિર જેવાં વૃક્ષો પણ કચ્છની ગરમ આબોહવામાં ઊગી રહ્યાં છે.