એપલના છોડ ભારતમાં રોપાયા, એ વટવૃક્ષ બનશે

ચીનમાં એપલને પાર્ટ્સ પૂરા પાડતી કંપનીઓમાંથી મોટા ભાગની કંપની વિદેશીઓની હતી. તે પણ એપલની પાછળ-પાછળ ચીન ગઈ હતી. તેમાંની મોટા ભાગની બીજે ખસી ગઈ અથવા તૈયારીમાં છે

- વિનોદ પંડ્યા

અગ્રેજીમાં રૂઢિપ્રયોગ છે, ‘યુ આર એન ઍપલ ઓફ માય આઈ.’ પ્રથમ દૃષ્ટિએ અનુવાદ એ થઈ શકે કે તમે મારી આંખની કીકી (સફરજન નહીં) સમાન છો. આ પણ ભાવાર્થ છે. વધુ સાચો અર્થ એ છે કે, ‘તમે મને ખૂબ વ્હાલા છો, પ્રિયજન છો.’ ઍપલના ફોન અર્થાત્ આઇફોન માટે પણ સાર્વત્રિક રીતે આ એટલું જ સાચું છે. આઇફોનની ઑપરેટિંગ સિસ્ટમ એટલી અધરી નથી જેટલી એની સુરક્ષા અને પાસવર્ડની સિસ્ટમ જડબેસલાક છે. ઑપરેટિંગ સિસ્ટમમાં એનો સ્ટોરેજ (મેમરી) વિભાગ ગૂંચવી મારે એવો છે. જેઓ નિપુણ હોય તેઓના માટે આઇફોન વરદાનરૂપ છે. ખાસ તો એટલા માટે કે પાસવર્ડ ભૂલાઈ ગયો, ખોવાઈ ગયો કે ખોટો પાસવર્ડ ત્રણ વખત વપરાયો તો ફોન કામ કરતો બંધ થઈ જાય. કોઈ ઍપ ડાઉનલૉડ ન થાય. માત્ર કૉલ આવે અને જાય એટલું જ થાય. જે નિપુણ ન હોય એ ધારકે દૂર શહેરમાં આવેલા આઇફોનના સર્વિસ સેન્ટર પર જવું પડે અને ત્યાં પણ લૉક ખોલવામાં સમય આપવો પડે. અમુક જૂના આઇફોન માટે દિવસો લાગી જાય.

આ લખનારે આજ સુધીમાં પાંચ આઇફોન અજમાવી જોયા, પણ મનને શાંતિ મળે એવી રીતે એક પણ વાપર્યો નથી, કારણ કે નિપુણતા નહીં મળે. છતાં જ્યારે ચાલે ત્યારે અન્ય તમામ ફોન ઍપલની વિસાતમાં ન આવે. એના કૅમેરા, પ્રોસેસર અને તમામ સિસ્ટમ પાવરફુલ. એટલે જેમને આવડત અને આવકની રીતે પોસાય તેઓ આઇફોન જ વાપરે. આઇફોનની કિંમત આજકાલ અમુક હાઈ-એન્ડ એન્ડ્રોઇડ ફોનની સમકક્ષ અને અમુક મૉડેલમાં ઓછી પણ છે, છતાં આઇફોન એક વર્ગમાં હજી પણ સ્ટેટસ સિમ્બોલ ગણાય છે. વડાપ્રધાન નરેન્દ્રભાઈ મોદી સોનેરી રંગનો આઇફોન વાપરે છે અને રાહુલ ગાંધી ચાલુ સંસદમાં, માતા સોનિયા ગાંધી ટોકતાં રહે છતાં આઇફોનમાં સતત માથું ઘાલીને વળગી પડે છે. આઇફોન વાપરતા હોય કે ન વાપરતા હોય, તમામ લોકો આઇફોન વિષે સારું જ બોલતા હોય છે. મતલબ કે તમામ માટે ‘ઍપલ ઓફ ધી આઈ’ છે.