ઓર્ગેનિકની વાત છોડોઃ તે નહીં મળે, માત્ર સમજી-વિચારીને ખાવ

ઑર્ગેનિકને બદલે નૈતિક ખેતી અને નૈતિક પશુપાલન અપનાવવાની જરૂર છે. વડાપ્રધાન કહે એ સાચું છે કે, ઑર્ગેનિક અથવા નૈસર્ગિક (પ્રાકૃતિક) કૃષિ પદ્ધતિ અપનાવવી એ આપણી ફરજ છે, પણ તેનાથી મોટી ફરજ સરકાર અને પ્રજા બંનેની છે કે ખોરાકને વિષયુક્ત બનતો અટકાવવામાં આવે.

ખોરાક, અન્ન અને શાકભાજી વિષેની રાંધણ કળા, પદાર્થો અને વિચારો હવે સમાન ધોરણે વિશ્વવ્યાપી બની રહ્યા છે. જોકે આ આદાન-પ્રદાન સેંકડો વરસોથી થતું આવ્યું છે અને કદાચ હજા૨ વરસોથી થતું આવ્યું છે. હમણાં હમણાં જગતમાં ઑર્ગેનિક ખેતી, ઑર્ગેનિક સૌંદર્ય પ્રસાધનો, ઑર્ગેનિક ખોરાક અને એક્સોટિવ અર્થાત્ નવી રોમાંચક વાનગીઓ અને શાકભાજીઓની બોલબાલા વધી છે. વડાપ્રધાન નરેન્દ્રભાઈ મોદીએ ગઈ પંદરમી ઑગસ્ટના રોજ લાલ કિલ્લા પરથી ઑર્ગેનિક ખેતી અપનાવવા પર ભાર મૂક્યો હતો. માનવીના અને ધરતીમાતાનાં સ્વાસ્થ્ય, શુદ્ધ હવા, પાણી, ખોરાક હોય તે અનિવાર્ય છે, પણ હવે મોડે મોડે સ્થિતિનું કરેક્શન કરવાનું આસાન નથી રહ્યું. એ સિવાય સરકારે જે થઈ શકે તેવાં કામો, શક્ય ઉકેલો ઘણા છે તેના પર ધ્યાન આપવું જોઈએ. ખોરાકની બાબતમાં કેટલીક આવકારદાયક અને કેટલીક ઘૃણાલાયક બાબતો બની રહી છે.

સારાને વધારે સારી રીતે અપનાવીને અને નબળાને નાબૂદ કરીને અમુક જાતે ઊભી કરેલી સમસ્યાનું નિવારણ થઈ શકે તેમ છે, માત્ર સરકાર અને સમાજની નિષ્ઠા અને દયાભાવનાની જરૂર છે.