ગુજરાતમાં જનાદેશની અકળલીલા નરકેસરીની ગર્જના અને ગુજરાતીઓના કેસરિયા

ભાજપે ૧૯૮૫માં કોંગ્રેસના માધવસિંહ સોલંકીએ સ્થાપેલો ૧૪૯ બેઠકોનો રેકોર્ડ તોડ્યો છે, જે આવનારાં અનેક વર્ષો સુધી અકબંધ રહે તેવી શક્યતા છે ગુજરાતના મુખ્યમંત્રી રાજ્યના સદ્નસીબે નખશિખ સજ્જન, સુશિક્ષિત અને સંસ્કારી ઉપરાંત નિષ્કલંક ટ્રેક રેકોર્ડ ધરાવનાર હોવાથી જનમાનસ તેમના પ્રત્યે આદરભાવથી જુએ છે

- સુધીર એસ. રાવલ

છેલ્લા કેટલાય સમયથી સમગ્ર દેશ આઠમી ડિસેમ્બર, ૨૦૨૨ની આતુરતાપૂર્વક રાહ જોઈ રહ્યો હતો. એની ઉત્કંઠા એ હતી કે વિધાનસભાની ચૂંટણી બાદ ગુજરાતનો જનાદેશ શું હશે? કેવો હશે? આખરે એ પળ આવી ગઈ અને જનાદેશ પ્રગટ થયો.. જાણે, ચમત્કારોનો ભંડાર..આશ્ચર્યોની ભરમાર..આનંદોલ્લાસ અપરંપાર..અત્ર, તત્ર, સર્વત્ર કમળનો જયજયકાર..! ‘આપણા નરેન્દ્રભાઈ’એ મતદારોનાં હૃદય-મનને સ્પર્શી જાય એ રીતે આત્મગૌરવ અને આત્મસંતોષથી છલોછલ એવો ‘આ ગુજરાત મેં બનાવ્યું છે’નો જયઘોષ કરવા આહ્વાન કર્યું અને કરોડો ગુજરાતી મતદારોએ કમળ, કમળ અને માત્ર કમળનાં નિશાન પર જે અમીવર્ષા વરસાવી, એ જ ગુજરાતનો જનાદેશ..જેનું એક લીટીમાં વર્ણન કરવું હોય તો કહી શકાય, નરકેસરીની ગર્જના અને ગુજરાતીઓના કેસરિયા..

જાણે, ચમત્કારોનો ભંડાર, આશ્ચર્યોની ભરમાર, આનંદોલ્લાસ અપરંપાર,….અને ગૌરવવંતા ગુજરાતી એવા ભારતના લાડકવાયા નરેન્દ્ર મોદીનો જય જયજયકાર…!

વિપક્ષોની વ્યથા-વેદનાનું તો શું કહેવું? મતદારો તો ભૂલી જ ગયા કે મોંઘવારી, બેરોજગારી, ભ્રષ્ટાચાર, કોરોનાના ચિત્કાર, પેપરલીક કૌભાંડ. મગફળી કૌભાંડ. ડગ્સ કૌભાંડ. સરકારી ગેરવહીવટ, મોરબી, મફત વીજળી બીલ, મફત શિક્ષણ, જૂની પેન્શન યોજના, આંદોલનો, માગણીઓ વગેરે..વગેરે.. મતદાન કરતી વખતે મતદારોએ કેટલું બધું યાદ રાખવાનું હતું, પણ મતદારો તો સાવ ‘ભૂલકણા’ નીકળ્યા અને એમણે એટલું જ યાદ રાખ્યું, જેટલું વડાપ્રધાને કહ્યું..!?! પરિણામ? કોંગ્રેસનો કચ્ચરઘાણ અને નવીનવેલી આમ આદમી પાર્ટી તો સૂનમૂન અને અવા! હવે શું કરવું? જનતા સમક્ષ જઈને શું કહેવું? બસ એટલું જ, ‘હે ગુજરાત, માફ કરો..!'

હવે શું કરવું? જનતા સમક્ષ જઈને શું કહેવું? બસ એટલું જ, ‘હે ગુજરાત, માફ કરો..!'