‘વાયુ’ અને ‘જલ’ બાદ ‘અગ્નિ’ પણ દર્શાવશે જેમ્સ કેમેરૂન

‘ધ ટર્મિનેટર’ અને ‘ટાઇટેનિક’ સર્જનારા જેમ્સ કેમેરૂનની ‘અવતાર: ધ વે ઑફ વૉટર’ રિલીઝ થઈ ચૂકી છે ત્યારે આ ફિલ્મ વિશે અને જેમ્સ કેમેરૂનની દૃશ્યકળા વિશે અહીં રસપ્રદ વાત કરી છે.

આ વર્ષે જેની લાંબા સમયથી રાહ જોવાતી હતી એ હોલિવૂડ ફિલ્મ ‘અવતારઃ ધ વે ઓફ વોટર’ ૧૬ ડિસેમ્બરે રિલીઝ થઈ. કેનેડિયન ફિલ્મમેકર જેમ્સ કેમેરૂનની આ મહત્ત્વાકાંક્ષી ફિલ્મ છે. ટેક્નોલોજીનો હંમેશાં આગવી રીતે ઉપયોગ કરીને, સિનેકળાની સીમાઓનો વિસ્તાર કરવા માટે જાણીતા કેમેરૂનની દિગ્દર્શક તરીકે આ નવમી ફિલ્મ છે.

‘અવતાર: ધ વે ઓફ વોટર’ ૧૩ વર્ષ પહેલાં ૨૦૦૯માં આવેલી ‘અવતાર’ ફિલ્મની ઉત્તરકથા છે. ‘ અવતાર'ની વિઝ્યુઅલ ઇફેક્ટ્સ અને સિનેમેટોગ્રાફી અવ્વલ હતી. ઓસ્કરમાં ૯ નોમિનેશન મેળવનાર અને તેમાંથી ત્રણ જીતનાર આ ફિલ્મની વાર્તા પણ રસપ્રદ હતી. મોટા ભાગની વિજ્ઞાનકથા આધારિત ફિલ્મોની જેમ તેમાં પરગ્રહવાસીઓ પૃથ્વી ઉપર આક્રમણ નથી કરતા, બલ્કે પૃથ્વી પર રહેતી માનવવસ્તી પેન્ડોરા નામના ગ્રહ ઉપર આક્રમણ કરે છે! આ ગ્રહ ઉપર હરિતવર્ણી પ્રજાતિ રહે છે. એ ગ્રહ પ્રત્યે પૃથ્વીવાસીઓનું ધ્યાન જવાનું કારણ એ છે કે, ત્યાં દુનિયાનું સૌથી મોંઘું ખનીજ છે, જેને અનોબટેનિયમ કહે છે.

‘સપના’ની દુનિયા

રસપ્રદ વાત એ છે કે, ૨૦૦૯માં રિલીઝ થયેલી ‘અવતાર'ની વાર્તા જેમ્સ કેમેરૂને ૧૯૯૪માં લખી નાખી હતી! શરૂઆતનાં તેનાં ૮૦ પાનાં તૈયાર જ હતાં અને ૧૯૯૯માં તેઓ લ્મિ રિલીઝ કરવાનું વિચારતા હતા. (૧૯૯૭માં જેમ્સ કેમેરૂનની ‘ટાઇટેનિક’ રિલીઝ થઈ હતી.) પરંતુ ‘અવતાર' રિલીઝ ન થઈ, કારણ કે જેમ્સ કેમેરૂનની જે કલ્પના હતી તે સ્તરના વિઝ્યુઅલ ઇફેક્ટ્સ અને ટેક્નોલોજી ત્યારે હાજર નહોતા!