આમ ઢીલા નહીં થઈ જવાનું ભ'ઈ; એ તો હારી પણ જવાય..!

મતદાન પૂર્વેની બબ્બે રાતોમાં તમે જે રીતે અને જે પ્રકારે અને જે સ્વરૂપે જનતાને સાચવી લીધી, એને જનતા થોડી ભૂલતી હશે..

- હર્ષદ પંડ્યા ‘શબ્દપ્રીત'

થોડા દિવસ પહેલાં ચૂંટણીનું રિઝલ્ટ જાહેર થયું, એ પછી ભલભલાનાં ભવિષ્યના નકશા બદલાઈ ગયા!

હારવાનો ડર રાખીને બેઠેલા જીતી ગયા! આ લોકોને તો હજીય વિશ્વાસ નથી બેસતો કે સા..લુ, ઘરની બહાર મારી આટલી બધી લોકપ્રિયતા છે?! ઘરમાં તો મને બધા હઇડ.. હઇડ.. કરતા રહે છે. આ હઇડ.. હઇડ..માંથી બચવા માટે મેં રાજકારણમાં ઝંપલાવ્યું અને જુઓ, એ હઇડ..

હઇડ.. મારા માટે કેટલું મોટું આશીર્વાદરૂપ નીવડ્યું! આ ચૂંટણીમાં હું જીતી ગયો એ માટે હું સૌથી પહેલાં તો મારી વાઇફનો આભાર માનીશ. એણે મારી સાથે આવો ‘હઇડ.. હઇડ..’ જેવો વહેવાર ન કર્યો હોત, તો હું રાજકારણમાં ક્યાં જવાનો જ હતો? તમારા જેવા એક બિનરાજકારણીએ એટલે કે એક માણસે તો મને ટોકેલોય ખરો, કે તું રાજકારણમાં તો જાય છે, પણ ત્યાં તો મોટા મગરમચ્છ જેવા ચમરબંધીઓ બેઠા છે, તારો ગજ નહીં વાગે અને બધા તને હઇડ.. હઇડ.. કરી નાખશે – ત્યારે જ મેં મનોમન નક્કી કરી નાખેલું કે, તો તો વાંધો નહીં. ‘મૅક્ટિસ મેક્સ અ મેન પરફેક્ટ!’ મને રાજકારણમાં ‘હઇડ.. હઇડ..’ થવાનો ડર સહેજ પણ લાગ્યો નહીં, કારણ કે આવો અનુભવ તો હું નોકરીમાંથી, (અને.. આમેય) રિટાયર થઈ ગયો ત્યારથી મારા ખુદના ઘરમાં મેળવી જ રહ્યો છું ને! જોયું, ક્યારેક લાયકાત કામમાં ન આવે ત્યારે અનુભવ કામમાં આવે છે! ‘ઍક્સપિરિયન્સ ઇઝ ધ બેસ્ટ ટીચર’ એવું કંઈ એમ ને એમ થોડું કહેવાયું હશે? જેણે કહ્યું હશે એનેય મારા જેવો પાણીદાર ઍક્સપિરિયન્સ થયો જ હશે ને?

પણ મિત્રો, આજે મારે વાત કરવી છે એક એવા નેતાની – જેમણે સપનામાં પણ હારવાનું વિચાર્યું નહોતું. એમના ઘરમાં વિવિધ ભાષાની જેટલી ડિક્શનરીઓ છે એમાંથી ‘હાર’ શબ્દને છેકી નાખ્યો છે. ‘હારવું’ શબ્દ એમને અંદરથી હચમચાવી નાખે છે. આ શબ્દની એમને એલર્જી છે, એ જ્યારે હારી ગયા ત્યારે એમના માટે ૧૦૮ ઍમ્બ્યુલન્સ વાન બોલાવવી પડેલી! કેટલાકે તો કમેન્ટ પણ કરી કે, ભલે ૧૦૮ બોલાવવી પડી, પણ આપણને એટલી તો ખબર પડી કે, એમનામાં હજીય હાર્ટ જેવું કશુંક તો છે!