ર૦ર૩નું વર્ષ ‘વિશ્વ બાજરા વર્ષ' તરીકે મનાવાશે..

બાજરો એ ગમે તેવી જમીનમાં સારો પાક આપે છે. ઓછા પાણીએ પાકે છે અને ઘઉં, ચોખા અને કઠોળ જેવા અનાજની સરખામણીમાં સસ્તો પડે છે. તેથી સૌને પોષાય તેવો છે એટલે બાજરાના પાકને અને બાજરાના વપરાશને ભારતમાં તેમ જ વૈશ્વિક સ્તરે પ્રોત્સાહન આપવાનો આશય રહેલો છે. આમ, ૨૦૨૩ના વર્ષમાં માત્ર ભારત જ નહીં તો વિશ્વભરમાં બાજરાની બોલબાલા રહેવાની છે.

- મુકેશ ઠક્કર

સંસદના વિતેલા શીત સત્ર દરમિયાન સંસદની કેન્ટિનમાં બાજરા ઉત્સવ ઊજવાયો, ત્યારે લોકોને આશ્ચર્ય થયું હશે, પરંતુ એ પછીના દિવસોમાં સંયુક્ત રાષ્ટ્ર સંઘ દ્વારા ૨૦૨૩ના વર્ષને બાજરા વર્ષ તરીકે મનાવવાની ઘોષણા કરવામાં આવી અને એ ઘોષણા સાથે બીજી વાત પણ સ્પષ્ટ થઈ કે સંયુક્ત રાષ્ટ્રના આ નિર્ણયમાં પણ ભારતની ભૂમિકા મહત્ત્વની રહી છે.

હકીકત એ છે કે, ૨૦૨૩ના વર્ષને ‘બાજરા વર્ષ' તરીકે ઊજવવાનું સૂચન ભારત દ્વારા જ કરવામાં આવ્યું હતું. ભારતે કરેલા સૂચન પછી ગત છ મહિના દરમિયાન સંયુક્ત રાષ્ટ્રના નેતૃત્વ હેઠળ બાજરી વિશે કેટલાક અભ્યાસ હાથ ધરવામાં આવ્યા હતા અને તેને વિશે સેમિનાર પણ યોજાયા હતા.

ભાજપના સૂચનને સંયુક્ત રાષ્ટ્રના લગભગ ૭૦ દેશોએ સમર્થન આપ્યું હતું. સંયુક્ત રાષ્ટ્રના વર્કશોપમાં પણ સભ્યદેશોના પ્રતિનિધિઓએ ભાગ લીધો હતો. આ બધી પૂર્વતૈયારી અને પ્રક્રિયાને અંતે ૨૦૨૩ના વર્ષને ‘બાજરા વર્ષ’ તરીકે મનાવવાનું નક્કી થયું. તેની પાછળ એક મોટો અને મહત્ત્વનો ઉદ્દેશ એ પણ છે કે, વિશ્વના અનેક દેશો આજે અનાજની અછત અને કુપોષણની સમસ્યાથી પીડાઈ રહ્યા છે. એવી સ્થિતિમાં બાજરો એક એવું અનાજ છે કે જે લોકોને સસ્તા દરે સારું પોષણ આપી શકે તેમ છે.