યોસેફ મેકવાન: મૌન તૂટ્યું ઓરડાનું..

‘આંગળિયાત’ના લેખક જૉસેફ મૅકવાનના નામ સાથે હજુય લોકો જેમના નામને ભેળવીને ઉલ્લેખે છે, એવા યોસેફ મૅકવાનનું જન્મસ્થાન અમદાવાદ. જોકે એમનું મૂળ વતન નડિયાદ-માતર પાસેનું માલાવાડા

- પરીક્ષિત જોશી

તારા સુધી આવી શક્યો તે શબ્દની કૃપા,

મારા સુધી જ પ્હોંચવા કરતો મથામણો..

ઈશુના નવા વર્ષના દિવસોનો માહોલ છે, ગુજરાતનાં ચર્ચોમાં બાઇબલનો જે પદ્યાત્મક ગુજરાતી અનુવાદ ગવાઈ રહ્યો છે એ અનુવાદ સ્ત્રોતસંહિતા (૧૯૮૦) નામે આપનારા ગુજરાતી ભાષાના કવિ યોસેફ મૅકવાન (જ. ૨૦.૧૨.૧૯૪૦, અ. ૨૫.૧૨.૨૦૨૨) તાજેતરમાં નાતાલના દિવસે અવસાન થયું. કેવો યોગાનુયોગ છે. માત્ર પાંચ દિવસ પહેલાં પોતાનો ૮૩મો જન્મદિવસ ઊજવી ચૂકેલા કવિ પોતાની કેફિયતમાં તો પૂરી વફાદારીથી કહે છે, દેવળોમાં ઘંટારવ સાથે મારાં સ્તોત્રો ગવાય છે એવું કામ કર્યું હોવા છતાં ઈશ્વર વિશે હું અવઢવમાં રહ્યો છું.

‘આંગળિયાત’ના લેખક જૉસેફ મૅકવાનના નામ સાથે હજુય લોકો જેમના નામને ભેળવીને ઉલ્લેખે છે, એવા યોસેફ મૅકવાનનું જન્મસ્થાન અમદાવાદ. જોકે એમનું મૂળ વતન નડિયાદ-માતર પાસેનું માલાવાડા. કૌટુંબિક પરિસ્થિતિઓને કારણે તેમણે એસ. એસ.સી. પછી અમદાવાદ મ્યુનિસિપલ ટ્રાન્સપોર્ટ સર્વિસમાં નોકરી કરવી પડી હતી, સાથોસાથ તેમણે અભ્યાસ ચાલુ રાખવાનો નિર્ણય કર્યો. પછી તો ૧૯૬૮માં ગુજરાતી વિષય સાથે બી.એ., ૧૯૭૦માં એમ.એ. થયા અને ૧૯૭૫માં બી.એડ. કર્યું.