આઈવીએફ સારવારથી દુર્લભ બનતી ગીર ગાયનું સંવર્ધન થશે

અદ્ભુત રોગપ્રતિકારક શક્તિ ધરાવતી અને મબલખ દૂધ આપતી મૂળ નસલની ગીર ગાય છેલ્લા કેટલાક સમયથી દુર્લભ બની રહી છે

- ઇમરાન દલ

ભરતમાં પશુ સંવર્ધન માટે આઈવીએફ ટ્રીટમૅન્ટનો પ્રયોગ નવી વાત નથી. એમાં ગીર ઓલાદની ગાય ઉપર પણ આ પ્રયોગ અગાઉ થઈ ચૂક્યો છે. વર્ષ ૨૦૨૦માં કેરળની એક ખાનગી ગૌશાળામાં આઈવીએફ પદ્ધતિથી ગીર નસલની વાછરડીને જન્મ આપવામાં સફળતા મળી હતી. હવે દેશમાં પ્રથમવાર સરકારી રાહે અમરેલી ખાતે આઈવીએફની આ સારવાર મોટા પાયે શરૂ થઈ છે, જે ગીર નસલની ગાય માટે આશીર્વાદરૂપ સાબિત થાય એવી આશા સેવાઈ રહી છે.

કેન્દ્ર અને રાજ્ય સરકારના સહયોગથી અમરેલીની અમર ડેરી ખાતે આ પ્રકારના આઈવીએફ થકી ગીર ગાયનું સંવર્ધન કરવાની યોજના અમલમાં મૂકવામાં આવી છે. ૩૧ ડિસેમ્બરે દેશની આ પ્રથમ આઈવીએફ વાનનું લોકાર્પણ કરાયું હતું.

અદ્ભુત રોગપ્રતિકારક શક્તિ ધરાવતી અને મબલખ દૂધ આપતી મૂળ નસલની ગીર ગાય છેલ્લા કેટલાક સમયથી દુર્લભ બની રહી છે. જૂજ પશુપાલકો પાસે જોવા મળતી આ નસલને બચાવી લેવા માટે નાનામોટા પ્રયાસો થઈ રહ્યા છે.