પેપરકાંડ કરનારાઓ સરકારને પડકારી રહ્યા છે

વારંવારની પેપરકાંડની ઘટનાઓ પછી સરકારે એટલું તો સમજવું જ જોઈએ કે આવી પરીક્ષા સંબંધે કોઈ સ્થાપિત હિતો નિર્માણ થઈ ગયા છે અને આ સ્થાપિત હિતો સરકાર અને તંત્રનું પગેરું દાબે છે

જુનિયર કલાર્કની પરીક્ષાના પેપર-લીક કાંડે ગુજરાતની ભાજપ સરકારની આબરૂના લીરા ઉડાવ્યા છે. મુખ્યપ્રધાન ભૂપેન્દ્ર પટેલની સરકાર પર આ મુદ્દે ચોમેરથી માછલાં ધોવાય છે. રાજ્ય સરકાર પાસે તેનો કોઈ બચાવ નથી. ન જ હોય. જે સરકાર ભૂતકાળના અનુભવોમાંથી કશું શીખે નહીં તેને શું કહેવું? રાજ્ય વિધાનસભાની ચૂંટણીમાં પણ પેપર-લીક કાંડનો મુદ્દો ઉછાળવામાં આવ્યો જ હતો. ભાજપના સારા નસીબે એવા મુદ્દાને લોકોએ લક્ષમાં લીધો ન હતો. બીજા અનેક મુદ્દાઓની માફક આ મુદ્દાની પણ ઉપેક્ષા કરાઈ હતી, પરંતુ ચૂંટણીના જનાદેશ પછી ભાજપની નવી સરકારે પેપરને ફૂટતાં અટકાવવા માટે જે કરવું જોઈએ એમાંનું કશું કર્યું નહીં. અમલદારશાહી અને વહીવટી તંત્રના ભરોસે ચાલતી સરકારની દુર્દશાને કોઈ અટકાવી શકે નહીં. શાસન તંત્ર માટે મુખ્યપ્રધાન અને તેમના પ્રધાનોનું વિઝન ક્યાં છે?