મંદીનું સ્વાગત થઈ શકે?

કોરોના પહેલાં આમ કે તેમ એવું ચલાવવામાં આવેલું કે હવે તેજી આવશે, કિન્તુ કોરોના પછી ધીરે છતાં મક્કમતાથી વૈશ્વિક અજગરો મંદીને આકાર આપી રહ્યા છે

- ગૌરાંગ અમીન

સટ્ટો ’ને સનેપાત સરખા, સ્થિતપ્રજ્ઞતા અલગ છે ક્યારે જાણશો

ત્યાગ જાતે કરો, મંદી બળજબરીથી છોડાવશે એ ત્યારે માનશો

મંદી આવી રહી છે? વર્લ્ડ બેન્ક એવું માને છે. ઇકોનોમિક્સ એવો ગજબનો વિષય છે કે તેમાં માન્યતાને મજબૂત સ્થાન મળેલું છે. સામાન્ય જનતા માટે આંકડાઓ નક્કર ચીજ છે તો બેંક, આંતરરાષ્ટ્રીય કંપની ’ને અર્થશાસ્ત્ર માટે ઓન પેપર યા સ્ક્રિન પરનું એક કેલ્ક્યુલેશન માત્ર છે. કોરોના પહેલાં આમ કે તેમ એવું ચલાવવામાં આવેલું કે હવે તેજી આવશે, કિન્તુ કોરોના પછી ધીરે છતાં મક્કમતાથી વૈશ્વિક અજગરો મંદીને આકાર આપી રહ્યા છે. પોતાના દેશના લોકો પાસેથી બિલિયન્સ ડૉલર્સ છીનવીને યુક્રેનને આપવાના મહાન દેખાતા કાર્ય પાછળ લાગણીનું પૂર કે અક્કલનો દાવાનળ નથી, પોતાની ગણતરીઓ છે. વિશ્વને હંકારતા દેશો, કોર્પોરેશન્સ ’ને બેન્કર્સ બરાબર ભાનમાં છે કે એમના પોતાના ’ને એમના લાગતાં વળગતાના સારા માટે શું કરવું. પશ્ચિમમાં વેક્સિનના નામે લાંબું પહોળું ધતિંગ ચલાવી લોકોને બાનમાં રાખનાર વિદેશી મીડિયા ચીનમાં જે કટ્ટર સરમુખત્યારશાહી ચાલે છે તેના વિષે મૌન છે. અમેરિકામાં લાખો ગેરકાયદેસર ઘૂસ્યા, અબજોનું ડ્રગ્સ ઘૂસ્યું ’ને કેટલાય ત્યાંના દેશી કેમિકલિયા નશામાં તેમ જ ગોળીબારોમાં મરે છે, છતાં ચુસ્ત ચુપ્પી સધાઈ રહી છે. નિશાન એક જ છે કે મંદી ઘસડીને લાવો 'ને એવી રીતે એવી મંદી લાવો જેનો કન્ટ્રોલ પણ ‘અમે’ કરીએ.