ભલભલાના અંદાજ બદલી નાખે અંદાજપત્ર!

બજેટનો સમયગાળો પણ ડબલ ઋતુ જેવો હોય છે. બપોરના સમયે ગરમી લાગે ને સવાર-સાંજ ઠંડી! પૈસા હોય તો બજેટ ઠંડું લાગે ને પૈસાની ઊણપ હોય તો બજેટ દાહક

- હર્ષદ પંડ્યા ‘શબ્દપ્રીત'

એવું નથી કે બજેટ પર માત્ર ખાસ આદમીની જ કે શ્રીમંતોની જ નજર હોય છે, ચોર લોકોની એટલી જ બાજ નજર હોય છે. ઊલટાનું, ચોર લોકો વધુ ઍલર્ટ થઈને જે-તે વર્ષના બજેટ ૫૨ અને તેનાં દૂરગામી પરિણામો પર વધારે ચિંતન-મનન કરતાં હોય છે. કહેવાય છે કે ચોર લોકોનું બજેટ જે વરસે ખોરવાય, એ દિવસે આમઆદમીનું એટલે કે મધ્યમ વર્ગનું બજેટ અચૂક ખોરવાય છે. ચોર વર્ગને અને મધ્યમ વર્ગને આમ ભલે કોઈ પ્રત્યક્ષ કે પરોક્ષ સંબંધ ન હોય, પણ આ બંનેનાં પર્સનલ બજેટને ગાઢ સંબંધ છે. બજેટના મારથી ચોર લોકો જ્યારે રડતા હોય છે ત્યારે બીજીબાજુ મધ્યમ વર્ગનો માણસ યુદ્ધના ધોરણે નૅપ્કિન શોધવાનું શરૂ કરી દેતો હોય છે. ના, પેલા ચોરનાં આંસુ લૂછવા માટે નહીં, એનાં ખુદનાં આંસુ લૂછવા માટે. ચોર વર્ગને રડાવતું બજેટ મધ્યમ વર્ગને ચેનથી સૂવા દેતું નથી, મોંઘવારી અને વધતો જતો ભાવ વધારો મધ્યમ વર્ગને આનંદ-ઉલ્લાસ માટે જાગવા દેતો નથી. અત્યારે અમને ‘મુઘલે આઝમ’ ફિલ્મનો પેલો સદાબહાર ડાયલોગ યાદ આવે છેઃ ‘અનારકલી, હમ તુમ્હેં જિને નહીં દેંગે ઔર સલીમ તુમ્હેં મરને નહીં દેગા..’ બજેટ પણ જુઓને, આવી જ ધમકી આપતું હોય છેઃ ‘મિડલક્લાસ મેન, હમારી વજહ સે મેહગાઈ તુમ્હે જાગને નહીં દેંગી ઔર ચોર તુમ્હે સોને નહીં દેંગે..’