સુરતમાં ૧૬ પ્રાંતની ૧૫ હજાર મહિલાઓએ કર્યું વિભિન્ન સાડીઓમાં વોકાથોન

સુરત મહાનગરપાલિકા અને સુરત સ્માર્ટ સિટી ડેવલોપમેન્ટ લિમિટેડ દ્વારા મહિલાઓ માટે ‘સુરત સાડી વૉકાથોન‘નું આયોજન થયું

- જિજ્ઞાસા સોલંકી

૯ એપ્રિલ, રવિવારની એ વહેલી સવાર સુરત માટે રોજ કરતાં કંઈક જુદી જ હતી. સવારના ૬:૩૦ વાગ્યાથી શહેરના અઠવાલાઇન્સ વિસ્તારમાં વિવિધ પ્રાંતની સાડીઓમાં સજ્જ થયેલી મહિલાઓનો જમાવડો થવા લાગ્યો. ગુજરાત, મહારાષ્ટ્ર, હરિયાણા, બિહાર, પશ્ચિમ બંગાળ, ઉત્તર પ્રદેશ, મધ્યપ્રદેશ, ઓડિશા જેવાં ૧૬ રાજ્યોની મહિલાઓ પોતાના પરંપરાગત પરિધાનમાં અઠવાલાઇન્સ વિસ્તારના પોલીસ પરેડ ગ્રાઉન્ડમાં ૧૫ હજાર મહિલાઓ ઉપસ્થિત થઈ. યોગ દ્વારા કાર્યક્રમની શરૂઆત થઈ. ત્યાર બાદ કેન્દ્રીય મંત્રી દર્શના જરદોશ, સાંસદ સી.આર. પાટીલ, ગૃહરાજ્યમંત્રી હર્ષ સંઘવી, મેયર હેમાલી બોઘાવાલા અને કમિશનર શાલિની અગ્રવાલે ફ્લેગ ઑફ કર્યું.

સુરત મહાનગરપાલિકા અને સુરત સ્માર્ટ સિટી ડેવલોપમેન્ટ લિમિટેડ દ્વારા મહિલાઓ માટે ‘સુરત સાડી વૉકાથોન‘નું આયોજન થયું. ‘વૉક ફોર યોર હેલ્થ ઇન સિક્સ યાર્ડ્સ ઑફ એલિગન્સ’ થીમ પર આધારિત વૉકાથોનનો ઉદ્દેશ મહિલાઓમાં આરોગ્ય અંગે જાગૃતિ લાવવાની સાથે ટૅક્સટાઇલ ઉદ્યોગને પ્રોત્સાહિત કરવાનો હતો.

20 લીલા પટોળામાં મેયર શાલિની અગ્રવાલ, જાંબલી બાંધણીમાં કેન્દ્રીય મંત્રી દર્શના જરદોશ, ઇકક્ત સાડીમાં W-20ના ચેરપર્સન સંધ્યા પૂરેચા તેમ જ અન્ય મહિલાઓ

નાની બાળકીઓથી લઈને ૬૦ વર્ષ સુધીની મહિલાઓએ પોલીસ પરેડ ગ્રાઉન્ડથી પાર્લે પોઇન્ટ સુધી નારી શક્તિનું પ્રદર્શન કર્યું. વહેલી સવારે ઊઠીને સાડીમાં સજ્જ થયેલી મહિલાઓનો ઉત્સાહ કંઈક જુદો જ હતો. વૉકાથોનમાં શહેરની આસપાસનાં ગામડાંઓ ઉપરાંત વિદેશી મહિલાઓ પણ ભારે ઉત્સાહથી જોડાઈ. ચાલવાની સાથે-સાથે સૌએ ઢોલના તાલે નૃત્ય અને ગરબા લેવાનો ભરપૂર આનંદ માણ્યો. જેના પ્રત્યે પૃથ્વીની પ્રત્યેક મહિલાઓને અસીમ પ્રીત છે, જે ખાવાથી સ્વર્ગનું સુખ માણ્યાની અનુભૂતિ થાય છે એ પાણીપૂરી આરોગવાનો આનંદ પણ અંતે માણ્યો. પાલિકા દ્વારા સ્પેશિયલ મહિલાઓ માટે પાણીપૂરીના સ્ટોલ પણ રાખવામાં આવ્યા હતા. મહિલાઓના એક બેન્ડ દ્વારા પ્રસ્તુત થયેલા સંગીતને લીધે કાર્યક્રમને ચાર ચાંદ લાગી ગયા.

પાટણના પટોળા