સારાન્વેષ

મધર મેરી : પવિત્રતાના પાયા પર...

- સ્પર્શે હાર્દિક

ભવિષ્યવાણી સાચી પડશે એ ડરથી કંસે દેવકીજીનાં સંતાનોની હત્યા કરી, છતાં કૃષ્ણ જન્મ્યા. આશરે ૨૮૦૦ વર્ષ પહેલાં યહૂદીઓની આગામી પેઢીઓને અનુલક્ષીને પેગંબર યશાયાહે પણ ભાવિકથન કરેલું, ‘તમારો ઈશ્વર યહોવા એક કુંવારીને મોકલશે, જે ગર્ભવતી બનીને પુત્રને જન્મ આપશે. તમે એનું નામ રાખશો ઇમ્માન્યુએલ.' ઇમ્માન્યુએલ યાને ઈશ્વર આપણી સાથે છે. આ કથનમાં એ સ્ત્રી માટે હિબ્રૂમાં પ્રયોજાયેલા શબ્દનો અનુવાદ થાયઃ કુમારી, જુવાન અપરિણીત સ્ત્રી. યશાયાહના ગ્રંથની ગ્રીક આવૃત્તિમાં એ શબ્દ છેઃ પાર્થેનોસ. ત્યાંથી ઇંગ્લિશમાં જે શબ્દ અવતર્યો એ છેઃ વર્જિન, યાને અક્ષતા, પવિત્ર કે અણુક્ત કન્યા. પ્રજોત્પત્તિની મનુષ્યસહજ ક્રિયા વિના જ એ કન્યા, મધર મેરીના ગર્ભમાં પુત્રનું પ્રાગટ્ય થવાનું હતું. એ પુત્ર એટલે જિસસ ક્રાઇસ્ટ, ઈસુ ખ્રિસ્ત. ગ્રીકમાં ખ્રિસ્તોસ એટલે અભિષિક્ત. ક્રાઇસ્ટ શબ્દ ત્યાંથી ઊતરી આવ્યો.