અઢળક નાણાં-કાળઝાળ ગરમી-અસહ્ય દબાણ -થાક: IPLમાં વિવાદ ના થાય તો જ નવાઈ!

વિરાટ કોહલીએ જ્યારે લખનૌના બેટ્સમેન કૃણાલ પંડ્યાનો કેચ લોન્ગ ઓફ પર કર્યો ત્યારે વિરાટનો ઉત્સાહ જોવા જેવો હતો. તે સ્ટેન્ડ તરફ જોઈને પોતાની છાતી ઠોકી રહ્યો હતો

- નલિન સોલંકી

મેદાનમાં આક્રમકતા પહેલાં ફૂટબૉલની રમતમાં જ જોવા મળતી હતી, પરંતુ હવે નાણાં અને પ્રેશરનો વધારો થતાં જેન્ટલમેન ગેમ કહેવાતી ક્રિકેટમાં આક્રમકતા અને વિવાદોની સંખ્યામાં જબ્બર ઉછાળો આવી ગયો છે. અગાઉ આંતરરાષ્ટ્રીય ક્રિકેટ ગણ્યાગાંઠ્યા દેશ વચ્ચે સીમિત માત્રામાં રમાતી હતી, પરંતુ હવે ફ્રેન્ચાઇઝી ક્રિકેટના પ્રવેશ પછી ક્રિકેટરો આખા વર્ષ દરમિયાન ક્રિકેટના મેદાનમાં રમતા રહે છે. શારીરિક અને માનસિક સ્ટ્રેસના કારણે ક્રિકેટરોની સહનશક્તિ ઘટી ગઈ છે. ઇન્ડિયન પ્રિમિયર લીગ (આઇપીએલ) દુનિયાની સૌથી મોટી ફ્રેન્ચાઇઝી લીગ છે, જેમાં રમવાનું દુનિયાના દરેક ક્રિકેટરનું સપનું બની ગયું છે, કારણ કે આઇપીએલમાં લગભગ બે મહિના રમવાનાં જેટલાં નાણાં મળે છે એનાથી અનેક ગણાં ઓછાં નાણાં ખેલાડીનો આખું વર્ષ દરમિયાન રમવાથી પણ મળતાં નથી. આઇપીએલના ઇતિહાસમાં ખેલાડીઓ વચ્ચે અનેક ઝઘડા જોવા મળ્યા છે. એમાં પણ હરભજનસિંહે તો ભૂતકાળમાં મેદાન પર જ શ્રીસંતને લાફો પણ મારી દીધો હતો.

મોટી લડાઈ અને વિવાદ હંમેશાં આઇપીએલ ઇતિહાસનો હિસ્સો રહ્યા છે. ઘણા ચાહકોએ આવી ઘટનાઓ નિહાળી છે, જ્યારે કેટલીક લડાઈનું તરત જ નિરાકરણ આવી ગયું છે, જ્યારે કેટલીક ઘટનાઓ પ્રતિબંધ અને દંડ સાથે આઇપીએલના ઇતિહાસમાં નોંધાઈ ચૂકી છે. આઇપીએલના આયોજકોએ હંમેશાં મેદાન પર સંયમ જાળવવા પર ભાર મૂક્યો છે અને ખેલાડીઓ પણ શિસ્ત જાળવે તેવી આશા રાખી છે.

૨૦૨૩ની આઇપીએલમાં મોટા ભાગની મેચમાં રોમાંચકતાએ હદ વટાવી દીધી છે. અનેક મેચ પરિણામ છેલ્લી ઓવર સુધી અથવા તો છેલ્લા સુધી પહોંચે છે. આટલા દબાણ અને ભારતની કાળઝાળ ગરમીમાં રમતા ખેલાડીઓ પર ફિઝિકલી અને મેન્ટલ સ્ટ્રેસ તો હોવાનો જ. આ જ કારણે ખેલાડી ક્યારેક મેદાનમાં પોતાના મગજ પરનો કાબૂ ગુમાવી બેસે છે અને મેદાનમાં જ એકબીજા સાથે ઝઘડી પડે છે.