રાજકાજ

ટ્રમ્પનો વિજય: આંતરરાષ્ટ્રીય સમીકરણોમાં કેવી અસર થશે?

- ચાણક્ય

અમેરિકાએ પોતાના નવા પ્રમુખને ચૂંટી લીધા છે. ડોનાલ્ડ ટ્રમ્પ બીજી વખત પ્રમુખ બનશે. ડેમોક્રેટિક ઉમેદવાર કમલા હેરિસ પરાસ્ત થયાં છે. અમેરિકાની આ ચૂંટણી વિશ્વના અનેક દેશો માટે પણ બહુ મહત્ત્વ ધરાવે છે. ટ્રમ્પના વિજયમાં ભારત પણ હરખાયું છે. વડાપ્રધાન નરેન્દ્ર મોદીના શુભેચ્છા સંદેશમાં ભારતીયોની ખુશી ઝળકે છે. અમેરિકાની ચૂંટણીનાં પરિણામોની અસર મુખ્યત્વે ચીન અને ઈરાન જેવા અનેક દેશો પર પડવાની છે. વિશ્વમાં યુદ્ધના બે મોરચા સક્રિય છે. આ બંને યુદ્ધોમાં અમેરિકાના નવા પ્રમુખની નીતિઓ અસર કરશે. ચીનને અમેરિકાના સૌથી મોટા આર્થિક પ્રતિસ્પર્ધી તરીકે માનવામાં આવે છે. ટ્રમ્પ પહેલેથી જ ચીન વિરુદ્ધ ટ્રેડવૉરની વાત કહી ચૂક્યા છે. તેમણે તેમના પ્રમુખ તરીકેના અગાઉના કાર્યકાળમાં ૨૫૦ બિલિયન ડૉલરની ટેરિફ ચીની આયાત પર લગાવી હતી. આ વર્ષે ટ્રમ્પે કહ્યું હતું કે જો તેઓ જીતશે તો ચીની માલ ઉપરની ટેરિફ ૬૦થી ૧૦૦ ટકા વધારી દેશે. સાથોસાથ ડેમોક્રેટ સરકાર આવ્યા પછી જો બાઇડેને તેમના કાર્યકાળમાં લાગુ કરેલી ટેરિફમાંથી પીછેહઠ કરવાની શક્યતા ઓછી છે.