રાજકાજ

રિયાસીમાં ત્રાસવાદી હુમલાના સમય-સંજોગનો સંકેત સમજો

- ચાણક્ય

દિલ્હીમાં નવી સરકારના શપથગ્રહણના દિવસે અને લગભગ એ જ સમયે જમ્મુ-કાશ્મીરના રિયાસી જિલ્લામાં ઉત્તર પ્રદેશના તીર્થયાત્રીઓની બસ પર ત્રાસવાદીઓ દ્વારા થયેલા હુમલાને હળવાશથી લેવા જેવો નથી. ઇરાદાપૂર્વક નક્કી કરાયેલા દિવસ અને સમયમાં પાકિસ્તાન પ્રેરિત ત્રાસવાદીઓનો નવી સરકારને ચેતવણીનો મેસેજ છે, એમ માનીને ચાલવું જોઈએ. ડ્રાઇવરને ગોળી વાગતાં બસ ખીણમાં પડી ગઈ, એટલે અડધા કલાક સુધી ચાલુ રહેલા ગોળીબારમાં મોટા ભાગના લોકો બચી ગયા. નવ લોકોનાં મૃત્યુ ઉપરાંત ૩૩ લોકો ઘાયલ થયા હતા. ત્રાસવાદીઓનો ઇરાદો તમામ યાત્રીઓને મોતને ઘાટ ઉતારવાનો હતો. આ હુમલામાં લશ્કર-એ-તોયબાનો હાથ હોવાની અને આ ત્રાસવાદી સંગઠને હુમલાનું પ્લાનિંગ પાકિસ્તાનની ધરતી પર તૈયાર કર્યું હોવાની વિગતો બહાર આવી છે. રાજૌરી-પૂંચ વિસ્તારનાં જંગલોમાં બાર જેટલા જેહાદીઓ રેકી કરતા હતા, એવી વાત પણ જણાવાય છે. આ જેહાદીઓમાં કેટલાક પાકિસ્તાની નાગરિકો સામેલ છે, જેમણે સુરંગ દ્વારા એલઓસી પાર કરી હોવાનું કહેવાય છે. જોકે, સુરક્ષા દળોએ આવી કોઈ સુરંગના અસ્તિત્વનો ઇનકાર કર્યો છે.