સામાજિક પ્રસંગો, ડાયરા, કથા સપ્તાહમાં વધતો જતો બાઉન્સરોનો ટ્રેન્ડ

અમદાવાદ, સુરત, વડોદરા, રાજકોટ, ભાવનગર જેવાં શહેરોમાં બાઉન્સર કલ્ચર આગળ વધતું જાય છે. મોભા સાથે સલામતીમાં વધારો છેલ્લાં ૧૦ વર્ષના સામાજિક પરિવર્તનમાં કારણભૂત.

- જિજ્ઞેશ ઠાકર

ગુજરાતી સમાજમાં ધીરે-ધીરે બાઉન્સર કલ્ચર આગળ વધી રહ્યું છે. છેલ્લાં દસ વર્ષમાં લગ્ન પ્રસંગો, ડાયરાઓ, સાંસ્કૃતિક કાર્યક્રમો જેવી ઇવેન્ટોમાં બાઉન્સર જોવા મળે છે. તેના માટે સલામતીનો હેતુ ઉપરાંત હવે પોતાને ત્યાં રક્ષણ માટે બાઉન્સર હોય એ મોભો પણ ગણાવા લાગ્યો છે અને એટલા જ કારણે છેલ્લા દસકામાં બાઉન્સરોની સંખ્યા વધતી ચાલી છે. વિવિધ સિક્યૉરિટી એજન્સીઓ પણ હવે પોતાને ત્યાં નોકરીમાં ગાર્ડ રાખવા ઉપરાંત બાઉન્સરોની પણ ખાસ ભરતી કરે છે, કારણ કે લોકો પોતાને ત્યાં ગાર્ડ રાખવાની સાથે બાઉન્સરોની પણ જરૂરિયાત અનુભવે છે. એટલે જ અમદાવાદ, સુરત, વડોદરા, રાજકોટ, ભાવનગર જેવાં શહેરોમાં બાઉન્સર કલ્ચર આગળ વધતું જાય છે.