વિઝા વિમર્શ,

ડોનાલ્ડ ટ્રમ્પનો હૃદયપલટો

- ડો.સુધીર શાહ

ઇમિગ્રન્ટો અને એમાં પણ ખાસ કરીને એશિયાઈ ઇમિગ્રન્ટો, જેઓ અમેરિકામાં આવીને વસે છે, એનો ઉગ્રપણે વિરોધ કરતા હતા, એવા અમેરિકાના ભૂતપૂર્વ પ્રેસિડન્ટ ડોનાલ્ડ ટ્રમ્પે ગુરુવાર, ૨૦ જૂન, ૨૦૨૪ના પોડકાસ્ટમાં જાહેરાત કરીને સૌને આશ્ચર્યમાં ગરકાવ કરી દીધા છે. એ સૂચવે છે કે, ડોનાલ્ડ ટ્રમ્પના ઇમિગ્રન્ટોની બાબતના વિચારોમાં હ્રદયપલટો થયો છે. રિપબ્લિકન પાર્ટીના અમેરિકાની આગામી પ્રેસિડન્ટ પદની ચૂંટણીના ઉમેદવાર ડોનાલ્ડ ટ્રમ્પ, જેઓ પહેલાં પણ એક વાર અમેરિકાના પ્રેસિડન્ટ રહી ચૂક્યા છે, એમણે હમણાં જ એમની ઇન્ટરનેટ ઉપરની ડિજિટલ ઓડિયો ફાઇલ એટલે કે પોડકાસ્ટમાં એવું જણાવ્યું છે કે, ‘પરદેશી ગ્રેજ્યુએટો, જેઓ અમેરિકાની યુનિ.માં ભણ્યા હોય અને ત્યાંથી જ સ્નાતક થયા હોય, બેચલર્સનો કોર્સ યા માસ્ટર્સનો કોર્સ કર્યો હોય એમને ગ્રીનકાર્ડ આપવા જોઈએ.’ આ આનંદ પામવાની વાત છે. ભારતમાંથી છેલ્લાં બે-ત્રણ વર્ષથી લગભગ ત્રણ લાખ જેટલા વિદ્યાર્થીઓ અમેરિકાની જુદી-જુદી યુનિ.માં અભ્યાસ કરવા જાય છે. એમાંથી મોટા ભાગના વિદ્યાર્થીઓની અમેરિકાનું ગ્રીનકાર્ડ મેળવવાની ઇચ્છા હોય છે.