આ છે દેશનું એકમાત્ર સંસ્કૃત દૈનિક

એક દાઉદી વહોરા વિદ્યાર્થી શાળામાં વૈકલ્પિક વિષય તરીકે ભણાવવામાં આવતી સંસ્કૃત ભાષાથી એટલો પ્રભાવિત થયો કે આગળ જતાં એણે સંસ્કૃત વર્તમાનપત્રનું પ્રકાશન શરૂ કર્યું. આર્થિક અડચણો છતાં ૧૩ વર્ષથી આ અખબાર અડીખમ રહ્યું છે.

- અરવિંદ ગોંડલિયા (સુરત)

મુર્તુઝા ખંભાતવાલા: સંસ્કૃતમાં અને સંસ્કૃત ભાષા માટે કંઈક કરવું છે એવી કિશોરાવસ્થામાં જન્મેલી લાગણીથી જ આ અખબાર શરૂ કર્યું.

યુરોપના દેશ આયરલૅન્ડમાં ધોરણ એકથી સંસ્કૃત ફરજિયાત વિષય છે. અમેરિકી અવકાશવિજ્ઞાન સંસ્થા (નાસા)માં પણ સંસ્કૃતમાં ખાસ વર્ગો લેવામાં આવે છે. નાસાના વિજ્ઞાનીઓ તો ત્યાં સુધી કહે છે કે સંસ્કૃત સૌથી વધુ વૈજ્ઞાનિક ભાષા છે અને કમ્પ્યુટર માટે અત્યંત ઉપયુક્ત છે. સમગ્ર વિશ્વ ભારતની આ પ્રાચીન ભાષાને અપનાવી રહ્યું છે, પ્રેમ કરી રહ્યું છે ત્યારે ભારતમાં પણ હવે સંસ્કૃતને ચાહનારાઓની સંખ્યામાં વધારો થઈ રહ્યો છે. જો કે લોકશાહીના ચોથા સ્તંભની વાત આવે ત્યારે ઘણી બધી ભાષામાં અનેક અખબાર પ્રકાશિત થાય છે, પણ સંસ્કૃતની અવગણના થઈ છે.

એ વચ્ચે આજે મુલાકાત લઈએ દેશમાં એકમાત્ર ગુજરાતના સુરતથી પ્રકાશિત થતા સંસ્કૃત દૈનિકની. અચરજ એ છે કે આ ન્યૂઝપેપર દાઉદી વહોરા સમાજના બે બંધુ ચલાવે છે. એમને એક સંસ્કૃત પ્રકાંડ બ્રાહ્મણનો અતૂટ સથવારો અને સધિયારો મળ્યા છે.

સુસ્વાગતમ્..

સુરતના ઉધના વિસ્તારમાં સંસ્કૃત દૈનિક અખબાર પ્રકાશિત કરતી એક નાનકડી ઑફિસમાંથી આ સુંદર શબ્દો સાથે અમને આવકાર મળ્યો. ગુજરાતી અને સંસ્કૃત ભાષાના શબ્દો ઑફિસમાં જાણે પકડદાવ રમતા હતા.