મન હોય તો માળવે જવાય...અને મેડલ પણ જિતાય.

ઉંમરના છ દાયકા પાર કરી ચૂકેલી આ મહિલાને જીવનમાં કંઈક કરવાનું બાકી હોય એમ લાગ્યા કરતું એટલે એમણે સ્વિમિંગ શીખવાનું શરૂ કર્યું. એટલું જ નહીં, રાજ્ય લેવલે અનેક હરીફાઈમાં ભાગ લઈ વિજયી પણ બન્યાં. એ પછીય કંઈક અધૂરપ લાગતી તો ભરતનાટ્યમ તથા કથક જેવાં ક્લાસિકલ નૃત્ય શીખ્યાં અને એમાં પણ વિશારદ હાંસિલ કરી. એ સાઈકલિંગ કરે, ક્લાસ ચલાવે અને સાથે જીવનથી નિરાશ થયેલી મહિલાઓમાં ઊર્જા ભરવાનું કામ પણ કરે.

- હેતલ રાવ

પરંપરા, જવાબદારી અને કપરા સંજોગો પાર કરીને એમણે પોતાના માટે એક નવો માર્ગ શોધ્યો. વાત છે અમદાવાદમાં રહેતાં શિરિનબહેન સોનીની. અત્યારે એમની ઉંમર છે ૬૬ વર્ષ.

શિરિનબહેન માટે કહી શકાય કે એમણે જાણે પાછલી ઉંમરે નવેસરથી જિંદગી જીવવાનું શરૂ કર્યું છે. જુઓને, ૫૮ વર્ષની ઉંમરે એ ભરતનાટ્યમ જેવું અઘરું ગણાતું ક્લાસિકલ નૃત્ય શીખ્યાં અને એમાં વિશારદ મેળવી એમએ પાર્ટ વનની પરીક્ષા પણ આપી. ૬૨ની ઉંમરે એમણે ભરતનાટ્યમની સાથે જ કથક શીખવાનું પણ શરૂ કર્યું તો વળી ૬૫ વર્ષે બાળપણના સપનાને જીવંત કરી સ્વિમિંગ શીખી સ્ટેટ લેવલની ચૅમ્પિયનશિપ જીતી. જીવનમાં અનેક અડચણ આવી, પરંતુ શિરિનબહેને અડગ રહીને ઉંમરના છ દાયકા પૂર્ણ કરીને પણ પોતાના સપનાને વેગ આપ્યો.

અમદાવાદ જ જેમની જન્મભૂમિ અને કર્મભૂમિ રહી એવા શહેરના જાણીતા સિવિલ એન્જિનિયર વિષ્ણુભાઈ સોનીનું પ્રથમ સંતાન એટલે શિરિન. માતા પ્રમોદાબહેન એક ઉમદા ગૃહિણી. શિરિનના જીવનની શરૂઆત એવા પરિવારમાં થઈ જ્યાં પરંપરા અને અનુશાસનનું ખૂબ મહત્ત્વ.

કોણ કહે છે, નવું શીખવાની કોઈ ઉંમર હોય છે. સાઠીમાં પ્રવેશવાની વેળાએ શિરિનબહેને નૃત્યકળામાં પારંગત બનવાનું વિચાર્યું અને એ પછી સ્વિમિંગ પણ શીખ્યાં.

શિક્ષણમાં શિરિનને બહુ ચિ. અમદાવાદની એચ.એલ. કૉમર્સ કૉલેજમાંથી સ્નાતક થયા પછી એમને આગળ ભણવાની અભિલાષા પણ હતી, પરંતુ પિતાના કહેવાથી ૨૧ વર્ષની ઉંમરે શિરિનબહેનનાં લગ્ન અમદાવાદમાં જ રહેતા અને એક ખાનગી કંપનીમાં કામ કરતા જિતેન્દ્રભાઈ સોની સાથે થયાં. સાસરીમાં ૭૦ વ્યક્તિના સંયુક્ત પરિવારમાં એ ખૂબ સહજતાથી ભળી ગયાં. લગ્નના ટૂંકા ગાળામાં જ એક દીકરી હરિતા અને પુત્ર અલ્પેશનાં માતા બન્યાં. પછી તો એ પત્ની, પુત્રવધૂ અને માતાની ભૂમિકા નિષ્ઠાથી નિભાવતાં રહ્યાં. હંમેશાં પરિવારને પ્રાથમિકતા આપવાને કારણે એ ક્યારેય પોતાનાં શોખ અને સપનાંને વાચા ન આપી શક્યાં.